జగన్‌కు బాబు ఢిల్లీ తలుపులు మూసేశారా?

By Pratap

Published: Sunday, September 4, 2011, 21:44 [IST]

హైదరాబాద్: జాతీయ స్థాయిలో వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి మద్దతు లభించకుండా తెలుగుదేశం పార్టీ అధ్యక్షుడు నారా చంద్రబాబు నాయుడు ఇప్పటికే వ్యూహాన్ని అమలు చేసినట్లు తెలుస్తోంది. జాతీయ పార్టీల మద్దతు కూడగట్టుకోవడానికి వైయస్ జగన్ సోమవారం ఢిల్లీ వెళ్తున్నారనే వార్తల నేపథ్యంలో ఆ ప్రచారం ఊపందుకుంది. అవినీతి వ్యతిరేక పోరాటంపై తృతీయ ఫ్రంట్ కార్యాచరణ ప్రకటన కోసమంటూ ఇటీవల ఢిల్లీ హంగామా చేసిన చంద్రబాబు అసలు వ్యూహం జగన్‌కు ఢిల్లీ స్థాయిలో మద్దతు లభించకుండా చూడడమేనని అంటున్నారు. రాష్ట్రంలో సిపిఐ కాస్తా దూరంగా ఉన్నా, జగన్‌తో నెయ్యానికి సై అనే పద్ధతిలో సిపిఎం వ్యవహరించింది. సిపిఎం రాష్ట్ర కార్యదర్శి బివి రాఘవులు ప్రకటనలు అప్పట్లో ఆ అభిప్రాయాన్ని కలిగించాయి. ఈ నేపథ్యంలో సిపిఎం మద్దతు లభించకుండా చేయడానికి ఢిల్లీ పర్యటనను ఆయన వాడుకున్నట్లు చెబుతున్నారు. మిగతా రాజకీయ పార్టీల మద్దతు కూడా లభించకుండా బిజెపి, కాంగ్రెసేతర పార్టీలను ఆయన కూడగట్టారు.

ఇక బిజెపి విషయానికి వస్తే కక్కలేక మింగలేక అనే పరిస్థితిలో చిక్కుకుంది. పార్లమెంటులో బిజెపి నేతలు సుష్మా స్వరాజ్, అరుణ్ జైట్లీ జగన్‌కు మద్దతిస్తున్నట్లుగా మాట్లాడి నిప్పు రాజేశారు. కొంత మేరకు వైయస్ జగన్‌కు అది నైతిక బలాన్ని ఇచ్చింది. అయితే, దాంతో రాష్ట్రంలో బిజెపి చిక్కుల్లో పడాల్సి వస్తుంది. సిబిఐ దర్యాప్తును వ్యతిరేకిస్తున్నారంటే, జగన్‌ను అవినీతిని సమర్థిస్తున్నారనే కన్నా సిబిఐ దర్యాప్తు జరిపితే తప్పేమిటనే ప్రశ్న బయలుదేరింది. దీంతో రాష్ట్రానికి చెందిన బిజెపి నాయకులు ఒక్కసారిగా వరుస పెట్టి ప్రకటనలు ఇచ్చారు. పార్లమెంటు సభ్యుడు ముప్పవరపు వెంకయ్యనాయుడు, సీనియర్ నేత బండారు దత్తాత్రేయ, బిజెపి రాష్ట్రాధ్యక్షుడు జి. కిషన్ రెడ్డి జగన్‌తో తమకు సంబంధం లేదంటూ మాట్లాడారు. సిబిఐ దర్యాప్తును సమర్థిస్తూ మాట్లాడారు. ఈ రకంగా జాతీయ స్థాయిలో జగన్‌కు మద్దతు దొరకని పరిస్థితిని చంద్రబాబు సృష్టించి పెట్టారని అంటున్నారు.

Published On September 4, 2011