సాగర్ వరద ఉధృతి: పులిచింతలకు భారీ వరద

గుంటూరు: నాగార్జున సాగర్‌కు వరద ఉధృతి పెరగడంతో పులిచింతలకు భారీ వరద నీరు వచ్చి చేరుతోంది. పులిచింతల ప్రాజెక్టు సామర్థ్యం నాలుగు టిఎంసిలు. కాగా నాగార్జున సాగర్ నుండి భారీ వరద నీరు పులిచింతలకు వచ్చి చేరుతుండటంతో గుంటూరు జిల్లాలోని పులిచింతల పరిసర గ్రామాల్లో వందల ఎకరాల పంట నీట మునిగి పోయింది. పులిచింతల పరిధిలోని బెల్లంకొండ, గొల్లపేట, కొల్లూరు, పులిచింతల తదితర గ్రామాల్లో ఎకరాలకు ఎకరాలు పంట నీట మునిగింది. నాగార్జున సాగర్‌లో నీటి ఉధృతి కారణంగా నల్గొండ జిల్లాలోని మేళ్లచెరువు, మట్టంపల్లిలో కూడా పంటలు నీట మునిగాయి. మరోవైపు వరద నీరు పెరుగుతుండటంతో పరిసర గ్రామాల ప్రజలను అధికారులు అప్రమత్తం చేశారు. వరద ఉధృతి మరింత పెరిగితే తీసుకోవాల్సిన జాగ్రత్తలను పరిశీలిస్తున్నారు.

ప్రకాశం బ్యారేజి వద్ద కూడా నీటి వరద పెరుగుతుండటంతో 70 గేట్లు ఎత్తి 1.54 క్యూసెక్కుల నీటిని విడుదల చేశారు. ప్రకాశం బ్యారేజి వద్ద ప్రస్తుత నీటి మట్టం 12.5 అడుగులుగా ఉంది. కృష్ణా జిల్లాలోనూ నీటి ఉధృతి కారణంగా పలు గ్రామాలు నీటిలో మునిగి పోయాయి. తొట్లవల్లూరు, లంగ గ్రామాలు జలదిగ్బంధంలో మునిగాయి. వందల ఎకరాల పంట సైతం నీట మునిగింది. నాగార్జున సాగర్‌కు భారీ వరద నీరు వచ్చి చేరటంతో మూడు రోజుల క్రితమే మంత్రులు నాగార్జున సాగర్ 26 గేట్లు ఎత్తిన విషయం తెలిసిందే.

English summary

Hundreds acres of crops dumped in Guntur and Nalgonda district by big floods from Nagarjuna Sagar.