భారత్‌కు ఏఐసిసి అధ్యక్షురాలు సోనియా గాంధీ

By Srinivas

Published: Thursday, September 8, 2011, 10:52 [IST]

న్యూఢిల్లీ: అమెరికాలో శస్త్ర చికిత్స అనంతరం ఏఐసిసి అధ్యక్షురాలు సోనియా గాంధీ గురువారం ఉదయం భారతదేశానికి చేరుకున్నారు. గర్భాశయ మఖద్వార క్యాన్సర్‌తో బాధపడిన సోనియా గాంధీ గత నెల ఆగస్టు రెండవ తేదిన అమెరికా వెళ్లిన విషయం తెలిసిందే. అక్కడ ఆమె చికిత్స చేయించుకున్నారు. చికిత్స అనంతరం కొన్ని రోజులు ఆసుపత్రిలోనే ఉన్నారు. ఆ తర్వాత అమెరికాలోనే కొన్ని రోజుల పాటు విశ్రాంతి తీసుకున్నారు. గురువారం వేకువ జామునే ఢిల్లీ చేరుకున్నారు. ప్రస్తుతం ఆమె పూర్తి ఆరోగ్యంగా ఉన్నట్లు పార్టీ వర్గాలు చెబుతున్నాయి.

సోనియా గాంధీ ఆగస్టు రెండవ తేదిన పార్లమెంటు సమావేశాలు ప్రారంభమయ్యాక నాలుగైదు రోజులకే అమెరికా వెళ్లారు. ఇప్పుడు పార్లమెంటు సమావేశాలు ముగుస్తున్న సమయంలో వచ్చారు. పార్లమెంటు సమావేశాలు జరుగుతున్న సమయంలో అన్నాహజారే అవినీతి వ్యతిరేక ఉద్యమానికి జడిసిన యుపిఏ ప్రభుత్వానికి సోనియా గాంధీ లేని లోటు బాగా కనిపించింది. అప్పట్లో ప్రధాని, పలువురు సీనియర్ కాంగ్రెసు నేతలు సైతం సోనియా లేక పోవడం లోటుగా ఉందన్నారు. భారత్ వచ్చిన సోనియా మరికొన్ని రోజులు విశ్రాంతి తీసుకొని పూర్తిస్థాయి పార్టీ కార్యక్రమాలలో పాలు పంచుకోనున్నట్లు తెలుస్తోంది.

Published On September 8, 2011