బ్రాహ్మణిలో సిఎంకు పాలు ఉందా: దాడి అనుమానం

By Pratap

Published: Saturday, September 10, 2011, 16:42 [IST]

హైదరాబాద్‌: కర్ణాటక మాజీ మంత్రి గాలి జనార్దన్ రెడ్డికి చెందిన బ్రహ్మణి స్టీల్స్‌లో ముఖ్యమంత్రికి కూడా భాగస్వామ్యం ఉందా అని తెలుగుదేశం పార్టీ సీనియర్‌ నేత దాడి వీరభద్రరావు అనుమానం వ్యక్తం చేశారు. ప్రభుత్వంతో కుదుర్చుకున్న ఒప్పందాలను ఉల్లంఘించినా, ప్రభుత్వాన్ని మోసం చేసినా సంబంధిత భూములను ఎందుకు రద్దు చేయడం లేదని ఆయన ప్రశ్నించారు. ఈ మేరకు ఆయన శనివారం ముఖ్యమంత్రి కిరణ్ కుమార్ రెడ్డికి ఓ లేఖ రాశారు. బ్రహ్మణి భూములను రద్దుచేయకపోవడంతో ముఖ్యమంత్రిని కూడా అనుమానించాల్సి వస్తోందన్నారు.

బ్రాహ్మణి ఉక్కు కర్మాగారం విషయంలో యాజమాన్యం పాల్పడిన అవినీతి, అక్రమాలు ప్రభుత్వాన్ని మోసగించి బ్యాంకు నుంచి రుణం పొందిన విషయాలను కూడా సీబీఐ విచారణ పరిధిలోకి తీసుకురావాలని ఆయన డిమాండ్‌ చేశారు.భూకేటాయింపులపై హౌస్‌ కమిటీ వేస్తామని అసెంబ్లీ వేదికగా ప్రకటన చేసి నిలబెట్టుకోలేకపోవడం దురదృష్టకరమన్నారు. ఈ తీరు సభ పట్ల ముఖ్యమంత్రికి ఉన్న గౌరవాన్ని స్పష్టం చేస్తోందన్నారు. తక్షణం బ్రహ్మణి కేటాయింపులను రద్దుచేసి గ్లోబల్‌ టెండర్లు పిలిచి స్టీల్‌ ప్లాంట్‌, ఎయిర్‌పోర్ట్‌ నిర్మాణానికి చర్యలు చేపట్టాలన్నారు.

Published On September 10, 2011