సిఎంకు తెలంగాణ మంత్రి కోమటిరెడ్డి బహిరంగ లేఖ

By Pratap

Published: Tuesday, September 20, 2011, 18:43 [IST]

హైదరాబాద్: తెలంగాణపై తెలంగాణకు చెందిన రాష్ట్ర మంత్రి కోమటిరెడ్డి వెంకటరెడ్డి మంగళవారం బహిరంగ లేఖ రాశారు. విద్యార్థులపై పోలీసుల దాడికి కలత చెంది తాను ఈ లేఖ రాస్తున్నట్లు ఆయన తెలిపారు. విద్యార్థులపై పోలీసుల దమనకాండ ఆపాలని ఆయన డిమాండ్ చేశారు. హైదరాబాదులోని నిజాం కళాశాల విద్యార్థులపై దాడికి బాధ్యుడైన టాస్క్‌ఫోర్స్ డిసిపిపై చర్యలు తీసుకోవాలని ఆయన డిమాండ్ చేశారు. సమ్మె చేస్తున్న ఉద్యోగులను తొలగిస్తామని సహచర మంత్రులతో బెదిరించే ప్రకటనలు చేయించడం మంచిది కాదని ఆయన అన్నారు.

ముఖ్యమంత్రిగా ప్రధాని మన్మోహన్ సింగ్‌కు, కాంగ్రెసు అధిష్టానానికి తెలంగాణపై వాస్తవ నివేదికను పంపించాలని ఆయన కిరణ్ కుమార్ రెడ్డిని కోరారు. తెలంగాణలో నిర్బంధం ఆపకపోతే సంభవించే పరిణామాలకు ప్రభుత్వమే బాధ్యత వహించాలని ఆయన హెచ్చరించారు. తెలంగాణ నుంచి పారామిలిటరీ బలగాలను ఉపసంహరించాలని ఆయన కోరారు. హైదరాబాదీనని చెప్పుకునే ముఖ్యమంత్రికి తెలంగాణ ప్రజల ఆకాంక్ష గురించి ప్రత్యేకంగా చెప్పాల్సిన అవసరం లేదని ఆయన అన్నారు.

Published On September 20, 2011