సిఎం కిరణ్ కుమార్ రెడ్డికి ఎర్రబెల్లి డెడ్ లైన్

హైదరాబాద్: విద్యుత్ అంశంపై ముఖ్యమంత్రి కిరణ్ కుమార్ రెడ్డికి తెలంగాణ తెలుగుదేశం పార్టీ ప్రజాప్రతినిధులు డెడ్ లైన్ విధించారు. మధ్యాహ్నం రెండు గంటల లోగా తెలంగాణలో రైతులకు విద్యుత్ కోతపై ప్రభుత్వం స్పష్టమైన నివేదిక ఇవ్వాలని టిడిపి సీనియర్ శాసనసభ్యుడు ఎర్రబెల్లి దయాకర్ రావు డిమాండ్ చేశారు. తెలంగాణ ప్రాంతంలోని రైతులకు విద్యుత్ ఇవ్వకపోతే పరిస్థితి తీవ్రంగా ఉంటుందని హెచ్చరించారు. తెలంగాణలో విద్యుత్ కోత విధించు ముందు ముఖ్యమంత్రి మొదట తన ఇంటికి కోత విధించుకోవాలని సూచించారు.

విద్యుత్ కోతపై ప్రభుత్వం నుండి మధ్యాహ్నం లోగా స్పష్టమైన వివరణ రాకపోతే విద్యుత్ సౌధను ముట్టడిస్తామని హెచ్చరించారు. సమ్మె వల్ల ప్రజలకు ఇబ్బందులు ఏర్పడుతున్నాయని ముఖ్యమంత్రి కేంద్రానికి తప్పుడు నివేదికలు పంపిస్తున్నారని అది సరికాదన్నారు. తెలంగాణలో జరుగుతున్న సకల జనుల సమ్మెకు రాజధానిలో ఉన్న సీమాంధ్ర ఉద్యోగులు సైతం మద్దతు ఇవ్వాలని ఆయన విజ్ఞప్తి చేశారు. సమ్మె వల్ల నష్ట పోయే వారిని బిక్షమెత్తైనా ఆదుకుంటామన్నారు.

English summary

Telangana Telugudesam Party senior MLA Errabelli Dayakar Rao put dead line CM Kiran Kumar Reddy on current.