ఢిల్లీ కాంగ్రెసు పెద్దలతో భేటీకి కెసిఆర్ ఎదురుచూపులు

By Pratap

Published: Saturday, October 1, 2011, 17:45 [IST]

న్యూఢిల్లీ: కాంగ్రెసు పెద్దలను కలవడానికి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు నిరీక్షించాల్సి వస్తోంది. తెలంగాణపై కాంగ్రెసు అధిష్టానం చర్చలను ముమ్మరం చేసిన నేపథ్యంలో కెసిఆర్, తెలంగాణ జెఎసి చైర్మన్ కోదండరామ్ ఢిల్లీకి చేరుకున్నారు. వారిద్దరు శనివారం మధ్యాహ్నం కేంద్ర మంత్రి ప్రణబ్ ముఖర్జీని కలవాల్సి ఉంది. కానీ, కోదండరామ్ సకాలంలో ఢిల్లీకి చేరుకోకపోవడంతో అది వాయిదా పడింది. అయితే, ప్రణబ్ ముఖర్జీ అత్యవసరంగా కోల్‌కత్తాకు వెళ్లారు. తెలంగాణపై కాంగ్రెసు కోర్ కమిటీ సమావేశం నిర్వహించిన అనంతరం ఆయన కోల్‌కత్తాకు బయలుదేరారు. దీంతో ప్రణబ్ ముఖర్జీని కెసిఆర్ కలుసుకోలేకపోయారు.

కాగా, కేంద్ర హోం మంత్రి పి. చిదంబరం తమిళనాడు పర్యటనలో ఉన్నారు. దాంతో చిదంబరాన్ని కలవడానికి కెసిఆర్‌కు వీలు కాలేదు. ప్రధాని మన్మోహన్ సింగ్‌ను కలుస్తామని కెసిఆర్ హైదరాబాదు నుంచి బయలుదేరే ముందు చెప్పారు. కానీ మన్మోహన్ సింగ్ ముంబై పర్యటనలో ఉన్నారు. శనివారం రాత్రి ఎనిమిది గంటలకు ఆయన ఢిల్లీ చేరుకునే అవకాశం ఉంది. అయితే, ఆయనకు ప్రధానమైన కార్యక్రమాలు ఉన్నట్లు తెలుస్తోంది. దీంతో ప్రధాని కెసిఆర్‌కు ఎప్పుడు అపాయింట్‌మెంట్ ఇస్తారనేది తెలియడం లేదు. తాము సంప్రదింపుల కోసం ఢిల్లీ వెళ్లడం లేదని కోదండరామ్ చెప్పారు.

Published On October 1, 2011