డాక్టర్ నరేష్ రెడ్డి తుపాకి కాల్పుల్లో దొంగ మృతి

హైదరాబాద్: హైదరాబాదులోని జూబ్లీహిల్స్‌లో శుక్రవారం అర్థరాత్రి సంచలన సంఘటన చోటు చేసుకుంది. ఓ డాక్టర్ లైసెన్స్‌డ్ రివాల్వర్‌తో జరిపిన కాల్పుల్లో ఓ దొంగ మరణించాడు. మరో దొంగ పోలీసుల చేతికి చిక్కాడు. పోలీసుల కథనం ప్రకారం - శుక్రవారం అర్థరాత్రి శివ, మురళి అనే దొంగలు జూబ్లీహిల్స్‌లోని భరణి అపార్టుమెంటులో ఉండే డాక్టర్ నరేష్ రెడ్డి నివాసంలోకి అద్దాలు పగులగొట్టి ప్రవేశించారు. ఇంట్లోని బంగారం, వెండి మూట కట్టుకుని పరారీ చిత్తగించడానికి పూనుకున్నారు. ఈ సమయంలో అలికిడికి వంట మనిషి లక్ష్మయ్య లేచాడు. దొంగలను చూసి కేకలు వేశాడు.

వంట మనిషి కేకలకు నిద్ర లేచిన నరేష్ రెడ్డి వచ్చి చూసే సరికి దొంగలు గోడ దూకి పారిపోయే ప్రయత్నంలో ఉన్నారు. దాంతో నరేష్ తన వద్ద ఉన్న రివాల్వర్‌తో గాలిలోకి కాల్పులు జరిపారు. అయినా దొంగలు తమ ప్రయత్నాలను మానుకోలేదు. దీంతో నేరుగా వారిపైకి గురి పెట్టి ఆయన కాల్పులు జరిపారు. ఈ కాల్పుల్లో మురళి అనే దొంగ మరణించాడు. అలికిడికి నిద్ర లేచిన ఇతర ఇళ్లలోని వారు శివను పట్టుకున్నారు. అతన్ని పోలీసులకు అప్పగించారు. సంఘటనా స్థలాన్ని హైదరాబాదు పోలీసు కమిషనర్ ఎకె ఖాన్ సందర్శించారు. ఆత్మరక్షణ కోసమే నరేష్ రెడ్డి కాల్పులు జరిపారని ఆయన చెప్పారు. వంటమనిషి సమయస్ఫూర్తితో వ్యవహరించాడని ఆయన ప్రశంసించారు. దొంగల నేపథ్యంపై పోలీసులు ఆరా తీస్తున్నారు.

English summary

As a doctor fired one of the thief has died at Jubilee Hills of Hyderabad friday night.