ఏదైనా అధిష్టానమేనన్న కేంద్రమంత్రి పురంధేశ్వరి

By Srinivas

Published: Monday, October 3, 2011, 7:48 [IST]

విశాఖపట్నం: తెలంగాణ సమస్యపై తేల్చాల్సింది పార్టీ అధిష్టానమేనని కేంద్ర సహాయ మంత్రి పురంధేశ్వరి ఆదివారం ఉదయం విశాఖపట్నంలో అన్నారు. తెలంగాణ సమస్య త్వరగా పరిష్కారమవుతుందని ఆమె అభిప్రాయపడ్డారు. కాంగ్రెసు పార్టీ దానిపై కసరత్తు చేస్తోందన్నారు. ఆదివారం జాతిపిత మహాత్మా గాంధీ జయంతి సందర్భంగా పురంధేశ్వరి విశాఖపట్నంలోని గ్రేటర్ విశాఖ మున్సిపల్ కార్పోరేషన్ కార్యాలయం ఎదురుగా ఉన్న మహాత్మా గాంధీ విగ్రహానికి పూలమాలలు వేసి నివాళులు అర్పించారు. ఈ సందర్భంగా ఆమె మీడియాతో మాట్లాడారు.

పార్టీ అధిష్టానం ఆదేశిస్తే మరోసారి తాను విశాఖపట్నం నుండి పోటీ చేయడానికి సిద్ధంగా ఉన్నానని ప్రకటించారు. గతంలోనూ ఆమె తెలంగాణ అంశం, విశాఖపట్నంలో పోటీ అంశంపై స్పందించారు. పురంధేశ్వరితో పాటు పలువురు శాసనసభ్యులు, నేతలు మహాత్ముడికి నివాళులు అర్పించారు.

Published On October 3, 2011