చర్యలు తప్పవు: తెలంగాణవాదులకు డిజిపి హెచ్చరిక

By Srinivas

Published: Monday, October 3, 2011, 15:19 [IST]

నెల్లూరు: ఉద్యమం పేరుతో ప్రజలకు ఇబ్బందులు కలిగిస్తే ఊరుకునేది లేదని రాష్ట్ర డైరెక్టర్ జనరల్ ఆఫ్ పోలీసు దినేష్ రెడ్డి సోమవారం ఆందోళనకారులను శ్రీ పొట్టి శ్రీరాములు నెల్లూరు జిల్లాలో హెచ్చరించారు. ఉద్యమాల పేరుతో చట్టాలు ఉల్లంఘిస్తే చూస్తూ ఊరుకునేది లేదన్నారు. చట్టానికి ఎవరూ అతీతులు కాదన్నారు. చట్టం పరిధిలో ఏం చేసినా పోలీసులు ఏమీ అనరని చట్టాలు ఉల్లంఘించినప్పుడు మాత్రమే జోక్యం చేసుకోవాల్సి ఉంటుందన్నారు. చట్టాన్ని ఎవరూ చేతులోకి తీసుకోవద్దన్నారు. బస్సులను అడ్డుకోవడం, మహిళలకు, పిల్లలకు ఇబ్బందులు కలిగించడం వంటివి చేస్తే కఠిన చర్యలు తప్పవన్నారు. రహదారుల బందుతో ప్రజలకు ఇబ్బందులన్నారు.

చైనేత, జౌళీ శాఖ మంత్రి శంకర రావు తనకు భద్రతా సిబ్బంది వద్దని ఫ్యాక్స్ ద్వారా లేఖను పంపినట్లు చెప్పారు. మద్దెలచెర్వు సూరి హత్య కేసులో ప్రధాన నిందితుడు భాను కిరణ్ పశ్చిమ గోదావరి జిల్లాలోనే ఉన్నట్లు తమకు సమాచారం ఉందన్నారు. భాను ఆచూకి కనుగొనడానికి ప్రత్యేక బృందంతో దర్యాఫ్తు జరిపిస్తున్నట్లు చెప్పారు. త్వరలో అతనిని పట్టుకుంటామని చెప్పారు. డాబాల్లో మద్యం విక్రయాలు లేకుండా చర్యలు తీసుకుంటామని చెప్పారు.

Published On October 3, 2011