బొత్సపై హెలికాప్టర్ పూల వర్షం, చిరంజీవికి పొగడ్తలు

By Srinivas

Published: Tuesday, October 4, 2011, 18:00 [IST]

అనంతపురం: ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణకు అనంతపురం జిల్లాలోని హిందూపురంలో ఘనస్వాగతం లభించింది. కాంగ్రెసు పార్టీ కార్యకర్త నవీన్ నిశ్చల్ బొత్సపై ఆకాశం నుండి హెలికాప్టర్‌తో పూలవర్షం కురిపించారు. మూడు రోజుల అనంత పర్యటనలో భాగంగా బొత్స సత్యనారాయణ మంగళవారం రెండో రోజు పర్యటిస్తున్నారు. ఈ సందర్భంగా ఆయనకు పలుచోట్ల కాంగ్రెసు కార్యకర్తలు ఘన స్వాగతం పలికారు. వైయస్సార్సీ పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి, తెలుగుదేశం పార్టీ అధినేత నారా చంద్రబాబు నాయుడుపై ధ్వజమెత్తిన బొత్స తిరుపతి శాసనసభ్యుడు చిరంజీవిపై ప్రశంసలు కురిపించారు.

సామాజిక న్యాయం కాంగ్రెసుతోనే సాధ్యమని భావించిన చిరంజీవి తన ప్రజారాజ్యం పార్టీని విలీనం చేశాడని అందుకు తాను ఆయనకు అభినందనలు తెలుపుతున్నట్లు చెప్పారు. కాగా ఆయన పర్యటనలో మరోసారి జిల్లాలో వర్గ విభేదాలు బయట పడ్డాయి. బొత్సపై పూలవర్షం కురిపించిన నవీన్ నిశ్చల్, మున్సిపల్ చైర్మన్ అనీల్ కుమార్ వర్గం మధ్య స్వల్పంగా తోపులాట చోటు చేసుకుంది. తొలి రోజైన సోమవారం మాజీ మంత్రి జేసి దివాకర్ రెడ్డి, మంత్రి రఘువీరా రెడ్డి వర్గం మధ్య విభేదాలు బొత్స సమక్షంలోనే పొడసూపిన విషయం తెలిసిందే.

Published On October 4, 2011