తెలంగాణపై కాంగ్రెసు అధిష్టానం డైలమా: ముఖ్యమంత్రి

By Pratap

Published: Monday, October 10, 2011, 10:20 [IST]

హైదరాబాద్: తెలంగాణపై తమ కాంగ్రెసు పార్టీ అధిష్టానం డైలమాలో ఉందని ముఖ్యమంత్రి కిరణ్ కుమార్ రెడ్డి అన్నారు. విద్యామంత్రులు పార్థసారథి, శైలజానాథ్ తనను కలిసినప్పుడు ఆయన ఆదివారం సాయంత్రం ఆ విధంగా అన్నారు. తెలంగాణపై నిర్ణయం తీసుకోవాల్సింది కేంద్ర ప్రభుత్వమేనని, వాళ్లే ఏం నిర్ణయం తీసుకోవాలో తెలియక డైలమాలో ఉన్నారని ఆయన అన్నారు. సమ్మె వల్ల ప్రజలు తీవ్ర ఇబ్బందులకు గురవుతున్నారని, అందువల్ల కఠినంగా వ్యవహరించాల్సి ఉంటుందని ఆయన అన్నారు. విద్యాసంస్థల బంద్ పేరుతో విద్యార్థుల భవిష్యత్తుతో ఆటలాడుకుంటున్నారని ఆయన విమర్శించారు.

విద్యాసంస్థలు మూత పడకుండా తగిన చర్యలు తీసుకోవాలని ఆయన సూచించారు. రవాణా, విద్యత్తు సమస్యలు కూడా తలెత్తకుండా వ్యవహరించాల్సి ఉందని ఆయన అన్నారు. ఉప ముఖ్యమంత్రి దామోదర రాజనర్సింహ, మంత్రులు సబితా ఇంద్రా రెడ్డి, పితాని సత్యనారాయణ, మోపిదేవి వెంకటరమణ కూడా ముఖ్యమంత్రిని వేర్వేరుగా కలిశారు. ఏదో ఒకటి త్వరగా చెప్పాలని తాను అధిష్టానానికి సూచించానని, అయితే ఆ విషయంపై అధిష్టానం తనకు ఏమీ చెప్పలేదని ఆయన అన్నారు. తెలంగాణపై ఏదో ఒకటి తేల్చకుండా సమ్మె విరమించాలని కోరడం వల్ల ప్రయోజనం ఉండదని ముఖ్యమంత్రి అభిప్రాయపడినట్లు సమాచారం.

Published On October 10, 2011