హైదరాబాద్ యుటిగా ఐదేళ్లు: కేంద్రం కొత్త ప్రతిపాదన?

By Srinivas

Published: Monday, October 10, 2011, 11:34 [IST]

హైదరాబాద్: తెలంగాణ రాష్ట్ర సమస్యను పరిష్కరించేందుకు కేంద్ర ప్రభుత్వం కొత్త ప్రతిపాదన తీసుకు వచ్చినట్లుగా తెలుస్తోంది. ఇప్పటి వరకు పదేళ్లు ఉమ్మడి రాజధాని, రెండు రాష్ట్రాలకు హైదరాబాదు రాజధాని తదితర ప్రతిపాదనలు వచ్చాయన్న విషయం తెలిసిందే. తాజాగా హైదరాబాదును ఐదేళ్లు కేంద్ర పాలిత ప్రాంతంగా ఉంచాలనే కొత్త ప్రతిపాదన తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు ముందుకు కేంద్రం తీసుకు వచ్చినట్లుగా తెలుస్తోంది. అయితే ఈ ప్రతిపాదనను కెసిఆర్ ఒప్పుకోలేదని సమాచారం. కొత్త ప్రతిపాదన రావడంతో కెసిఆర్ సోమవారం సాయంత్రం ఢిల్లీ బయలుదేరి వెళ్లనున్నారు.

ఐదేళ్ల పాటు హైదరాబాదును కేంద్ర పాలిత ప్రాంతంగా ఉంచి ఆ తర్వాత తెలంగాణ రాజధానిగా చేసే అవకాశాలు కనిపిస్తున్నాయి. కెసిఆర్ మంగళవారం కేంద్రమంత్రులు చిదంబరం, ప్రణబ్ ముఖర్జీలను కలిసే అవకాశం ఉంది. ఇటీవల తెలంగాణ రాజకీయ ఐక్య కార్యాచరణ సమితి నేతలతో కెసిఆర్ ఢిల్లీ వెళ్లిన విషయం తెలిసిందే అప్పుడే ఆయన ప్రణబ్‌తో భేటీ కావాల్సి ఉన్నప్పటికీ ఆయన తన సొంత రాష్ట్రం వెళ్లడంతో అప్పుడు రద్దయింది. కెసిఆర్ ఇప్పుడు రెండోసారి ఢిల్లీ వెళ్లి ప్రణబ్‌ను కలవనున్నారు.

Published On October 10, 2011