తలలు తెగినా హైదరాబాద్ వదులుకోం: కెసిఆర్

By Srinivas

Published: Monday, October 10, 2011, 17:38 [IST]

అదిలాబాద్: తమ తలలు తెగినా హైదరాబాదును వదులుకునే ప్రసక్తి లేదని తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు సోమవారం అదిలాబాద్‌లో ఏర్పాటు చేసిన బహిరంగ సభలో అన్నారు. సకల జనుల సమ్మెలో తెలంగాణ ప్రజలు అందరూ పాల్గొనాలని విజ్ఞప్తి చేశారు. ఎట్టి పరిస్థితుల్లోనూ ఉద్యమం ఆపే ప్రసక్తి లేదన్నారు. సమ్మెలో పాల్గొనే ఉద్యోగులకు తెలంగాణ రాష్ట్రం వచ్చాక బోనస్ సహా జీతాలు చెల్లిస్తామన్నారు. కేంద్రం మెడలు వంచైనా తెలంగాణ సాధిస్తామన్నారు. ప్రత్యేక రాష్ట్రం ఏర్పడితే తప్ప లోయర్ పెన్ గంగా పూర్తి కాదన్నారు. గమ్యాన్ని ముద్దాడే వరకు ఎత్తిన పిడికిలి బిగించేది లేదన్నారు.

అంతకుముందు ఆయన తెలంగాణ రాజకీయ నేతలపై అగ్గిమీద గుగ్గిలం అయ్యారు. తెలంగాణ రాజకీయ నేతలు దద్దమ్మలన్నారు. ఇంత ఉద్యమం జరుగుతున్నా వారిలో చలనం లేదన్నారు. ఉద్యోగులే ఉద్యమాన్ని నడిపిస్తున్నారని టిఎన్జీవోలను సువర్ణాక్షరాలతో లిఖించాలన్నారు. రాష్ట్రం వచ్చేదాకా సమ్మె కొనసాగుతుందన్నారు. తెలంగాణలోని ముస్లింలంతా ప్రత్యేక రాష్ట్రానికి అనుకూలంగా ఉన్నారన్నారు. కాగా ఇటీవలె తెలుగుదేశం పార్టీకి రాజీనామా చేసినశాసనసభ్యుడు జోగు రామన్న కెసిఆర్ సమక్షంలో టిఆర్ఎస్‌లో చేరారు.

Published On October 10, 2011