జూబ్లీ బస్ స్టేషన్లో జెఏసి చైర్మన్ కోదండరాం అరెస్టు

By Srinivas

Published: Monday, October 10, 2011, 17:12 [IST]

హైదరాబాద్: తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరాంను పోలీసులు సోమవారం అరెస్టు చేశారు. జూబ్లీ బస్ స్టేషన్ వద్ద వంటావార్పు కార్యక్రమంలో పాల్గొన్న కోదండరాం సహా పలువురు నేతలను పోలీసులు అరెస్టు చేశారు. కోదండరాంను బోయిన్‌పల్లి, ఎన్ఎంయు నేత అశ్వత్థామ, రాజారెడ్డిలను బొల్లారం పోలీసు స్టేషన్‌లకు తరలించారు. వంటా వార్పు కార్యక్రమంలో పాల్గొని వెళుతున్న సమయంలో తమను అరెస్టు చేయడం దారుణమని కోదండరాం అన్నారు. ఉద్యమాన్ని అణిచి వేయడానికి ప్రభుత్వం కుట్ర చేస్తుందని ఆరోపించారు. అరెస్టు చేసిన నేతలను విడుదల చేయకుంటే తీవ్ర పరిణామాలు ఉంటాయని తెలంగాణ ఉద్యోగ సంఘాల నేత విఠల్ హెచ్చరించారు.

నేతలను అరెస్టు చేయడంతో ఆర్టీసి కార్మికులు ఆందోళనకు దిగారు. దీంతో పోలీసులు, కార్మికులకు మధ్య తోపులాట జరిగింది. దీంతో జూబ్లీలో పరిస్థితి ఉద్రిక్తంగా మారింది. కాగా అంతకుముందు ప్రదేశ్ కాంగ్రెసు కమిటీ అధ్యక్షుడు బొత్స సత్యనారాయణతో చర్చల అనంతరం ఎన్ఎంయు నేతలు మహమూద్, నాగేశ్వర రావు సమ్మెకు కొంత విరామం ఇస్తున్నట్లు ప్రకటించిన విషయం తెలిసిందే. సమ్మె విరమణ ప్రకటనపై తెలంగాణవ్యాప్తంగా పది జిల్లాల్లోని ఆర్టీసీ కార్మికులు మండిపడ్డారు. ఆర్టీసీ డిపోల వద్ద వారి దిష్టిబొమ్మలు దగ్ధం చేశారు. ప్రభుత్వానికి అమ్ముడుపోయి సమ్మె విరమించారని విమర్శించారు.

Published On October 10, 2011