తెలంగాణపై ఈ రోజు ప్రకటన లేనట్లే, జాతీయ పార్టీలతో చర్చలు

By Pratap

Published: Monday, October 10, 2011, 16:37 [IST]

న్యూఢిల్లీ: తెలంగాణపై సోమవారం సాయంత్రం ప్రకటన వెలువడే అవకాశం లేదు. సోమవారం తెలంగాణపై కాంగ్రెసు అధిష్టానం గానీ, కేంద్ర ప్రభుత్వం పెద్దలు గానీ ఏదో ఒక ప్రకటన చేస్తాయని భావించాయి. తెలంగాణపై కాంగ్రెసు వైఖరిని స్పష్టం చేసే దిశగా చర్చలు జరిగాయని, కాంగ్రెసు అధిష్టానం తన వైఖరిని సోమవారం వెల్లడిస్తుందని భావించారు. కానీ, కాంగ్రెసు ఆంధ్రప్రదేశ్ వ్యవహారాల ఇంచార్జీ గులాం నబీ ఆజాద్ ప్రకటనను బట్టి ఆ విషయం అర్థమవుతోంది. తెలంగాణపై చర్చించడానికి సోమవారం తలపెట్టిన పార్టీ కోర్ కమిటీ సమావేశం రద్దయిటన్లు ఆయన చెప్పారు.

తెలంగాణపై సోమవారం కాంగ్రెసు నాయకుడు చిరంజీవి, ఎఐసిసి అధికార ప్రతినిధి రేణుకా చౌదరితో కాంగ్రెసు మినీ కోర్ కమిటీ చర్చలు జరిపింది. వారి అభిప్రాయాలను అడిగి తెలుసుకుంది. ఆ చర్చల తర్వాత ఆజాద్ మీడియాతో మాట్లాడారు. పార్టీ ముఖ్య నాయకులతో చర్చలు పూర్తయ్యాయని, మూడో విడతగా జాతీయ స్థాయిలో జాతీయ పార్టీలతో చర్చలు జరపాల్సి ఉందని ఆయన చెప్పారు. దీన్ని బట్టి కూడా కాంగ్రెసు పార్టీ సంప్రదింపుల పేరుతో తెలంగాణపై నిర్ణయం వెలువరించే విషయంలో మరింత సమయం తీసుకోవాలని భావిస్తున్నట్లు తెలుస్తోంది.

Published On October 10, 2011