శ్రీలక్ష్మి ఇంట్లో ఏమీ దొరకలేదు: కోర్టుకు సిబిఐ నివేదిక

By Pratap

Published: Monday, October 10, 2011, 19:47 [IST]

హైదరాబాద్: కర్ణాటక మాజీ మంత్రి గాలి జనార్దన్ రెడ్డి అక్రమ గనుల తవ్వకం కేసులో ఐఎఎస్ అధికారి శ్రీలక్ష్మి నివాసంలో గానీ కార్యాలయంలో గానీ ఏమీ దొరకలేదని సిబిఐ స్పష్టం చేసింది. ఈ మేరకు సిబిఐ సోమవారం ప్రత్యేక కోర్టుకు నివేదిక సమర్పించింది. శ్రీలక్ష్మి నివాసంలో, కార్యాలయంలో సిబిఐ అధికారులు సోదాలు నిర్వహించిన విషయం తెలిసిందే. శ్రీలక్ష్మి నివాసంలో గానీ కార్యాలయంలో గానీ పత్రాలు, హార్డ్ డిస్కులు దొరకలేదని సిబిఐ చెప్పింది. శ్రీలక్ష్మి పేర ఆస్తులు కూడా లేవని చెప్పింది.

కాగా, గాలి జనార్దన్ రెడ్డి గనుల అక్రమ తవ్వకాల కేసులో మరో ఐఎఎస్ అధికారి, గనుల శాఖ మాజీ డైరెక్టర్ రాజగోపాల్ ముందస్తు బెయిల్ కోసం ప్రయత్నిస్తున్నట్లు సమాచారం. రాజగోపాల్‌ను సిబిఐ అధికారులు పలుమార్లు ప్రశ్నించిన విషయం తెలిసిందే. ఈ క్రమంలో తన అరెస్టు జరగవచ్చునని వార్తలు వస్తున్న నేపథ్యంలో ఆయన సోమవారం ముందస్తు బెయిల్ కోసం కోర్టులో పిటిషన్ దాఖలు చేయడానికి ప్రయత్నించారని చెబుతున్నారు. కోర్టు సమయం మించిపోవడంతో సోమవారం అది సాధ్యం కాలేదు. రేపు మంగళవారం ఆయన ముందస్తు బెయిల్ కోసం కోర్టులో పిటిషన్ దాఖలు చేసే అవకాశం ఉంది.

ఇదిలా ఉంటే, వైయస్సార్ కాంగ్రెసు పార్టీ అధ్యక్షుడు వైయస్ జగన్ ఆస్తుల కేసులో సిబిఐ అధికారులు సోమవారం వాన్‌పిక్ భూముల లావాదేవీలపై ప్రకాశం జిల్లా దేవరంపాడులో విచారణ జరిపారు. భూముల కొనుగోళ్లు, ప్రభుత్వ భూముల కేటాయింపు రికార్డులను సిబిఐ అధికారులు పరిశీలించారు. బినామీ లబ్ధిదారుల వివరాలను సేకరించారు.

Published On October 10, 2011