విద్యాసంస్థల బంద్: ఎన్నారై కళాశాల వద్ద ఉద్రిక్తత

By Srinivas

Published: Monday, October 10, 2011, 10:42 [IST]

హైదరాబాద్: సకల జనుల సమ్మెలో భాగంగా మూతపడ్డ కళాశాలలు, పాఠశాలలు తెరవాలని విద్యార్థుల భవిష్యత్తును నాశనం చేయవద్దని డిమాండ్ చేస్తూ హైదరాబాదులోని కూకట్‌పల్లి ఎన్నారై కళాశాల వద్ద విద్యార్థుల తల్లిదండ్రులు ఆందోళనకు దిగారు. వెంటనే తెరవాలని డిమాండ్ చేస్తూ వారు కళాశాల ముందు ఆందోళనకు దిగారు. అయితే వారి ప్రయత్నాలను తెలంగాణ రాష్ట్ర సమితి విద్యార్థి విభాగం కార్యకర్తలు అడ్డుకునే ప్రయత్నం చేశారు. కళాశాల తెరవనిచ్చేది లేదని హెచ్చరించారు. కళాశాల తెరవద్దంటూ పోటీగా ఆందోళనకు దిగారు. రాళ్లతో కళాశాలపై దాడి చేయడంతో అద్దాలు పగిలిపోయాయి. పరిస్థితి అదుపు తప్పుతుండటంతో భారీగా పోలీసులను మోహరించారు. ఆందోళనకారులపై పోలీసులు లాఠీఛార్జ్ చేశారు.

కాగా ఆదివారం కూడా విద్యార్థుల తల్లిదండ్రులు పాఠశాలలు, కళాశాలలు తెరవాలని డిమాండ్ చేస్తూ కూకట్‌పల్లిలో ఆందోళనకు దిగిన విషయం తెలిసిందే. కాగా సకల జనుల సమ్మె సోమవారం 28వ రోజుకు చేరుకుంది. ఆర్టీసీ, సింగరేణి, విద్యుత్, వైద్య ఆరోగ్య ఉద్యోగులు విధులు బహిష్కరించి నిరసనలు తెలుపుతున్నారు. తెలంగాణ ప్రకటించే వరకు తాము విధులకు వెళ్లేది లేదని హెచ్చరిస్తున్నారు.

Published On October 10, 2011