తెలంగాణవాదులకు రైల్వే అధికారుల హెచ్చరిక

By Srinivas

Published: Monday, October 10, 2011, 16:40 [IST]

హైదరాబాద్: సకల జనుల సమ్మెలో భాగంగా ఈ నెల 12, 13, 14 తేదీల్లో మూడు రోజుల పాటు రైలు రోకో చేస్తే కఠిన చర్యలు తీసుకుంటామని రైల్వే అదనపు డిజి హుడా సోమవారం తెలంగాణవాదులను హెచ్చరించారు. రైలు రోకో పేరుతో సంస్థ ఆస్తులకు నష్టం కలిగిస్తే చూస్తూ ఊరుకునేది లేదన్నారు. ఆందోళనకారులు పరిధులు దాటితే పోలీసులు కఠినంగా వ్యవహరించక తప్పదన్నారు. రైల్వే ప్రయాణీకులకు ఇబ్బందులు కలిగిస్తే ఉద్యమకారులతో పాటు నేతల పైనా రైల్వే చట్టం కింద కేసులు పెట్టి చర్యలు తీసుకుంటామని హెచ్చరించారు. ప్రయాణీకులకు ఇబ్బందులు కలిగిస్తే ప్రేక్షకుల్లా చూస్తూ ఊరుకునేది లేదని హెచ్చరించారు. రైల్వే రోకోపై తెలంగాణవాదులు పునరాలోచించుకోవాలన్నారు. మూడు రోజుల రైలు రోకో అంటే ప్రజలకు తీవ్ర ఇబ్బందులన్నారు.

మరోవైపు ఆర్టీసి ఎండి ప్రసాద రావు కూడా తెలంగాణలోని అన్ని జిల్లాల్లో బస్సులు నడపనున్నట్లు ప్రకటించారు. మంగళవారం నుండి బస్సులు నడుస్తాయని రెండు మూడు రోజుల్లో సర్వీసులన్నీ యథాతథం అవుతాయన్నారు. హైదరాబాదుతో పాటు తెలంగాణలోని పది జిల్లాల్లో పోలీసుల సహాయంతో బస్సులు నడిపిస్తామని చెప్పారు. సమ్మె కాలంలో వేతనాలు, పండుగ అడ్వాన్సు చెల్లించేందుకు అంగీకరించినట్లు చెప్పారు. కాంట్రాక్టు కార్మికులను రెగ్యూలరైజ్ చేసే డిమాండ్లు పరిశీలిస్తున్నట్లు చెప్పారు.

Published On October 10, 2011