న్యాయం అడిగినందుకే నాపై దొంగ కేసు: వైయస్ జగన్

విజయవాడ: ఒక పార్లమెంటు సభ్యుడిని, పార్టీ అధ్యక్షుడైన తన పైనే పోలీసులు దొంగ కేసు పెట్టారని వైయస్సార్సీ పార్టీ అధ్యక్షుడు, కడప ఎంపీ వైయస్ జగన్మోహన్ రెడ్డి సోమవారం కృష్ణా జిల్లా గన్నవరం ఎయిర్ పోర్టులో మీడియాతో అన్నారు. తన పైన దొంగ కేసులు పెట్టే అధ్వాన్న రాజకీయ పరిస్థితులు ప్రస్తుతం దాపురించాయని విమర్శించారు. ఓ పిల్లవాడిని పోలీసులు అతిదారుణంగా కొడితే దానిని ప్రశ్నించడానికి పోలీసు స్టేషన్‌కు వెళ్లానన్నారు. పిఎస్‌లో ఫర్నీచర్ ధ్వంసం చేశారని, విధులకు ఆటంకం కలిగించానని ఆరోపిస్తూ తనతో పాటు మరో 68 మందిపై కేసులు పెట్టారన్నారు. మీడియా సాక్షిగా తాము పిఎస్ ముందు ఆందోళనకు దిగామన్నారు.

పిఎస్‌లో ఒక్క పోలీసు అధికారి లేనప్పుడు ఎవరి విధులకు భంగం కలిగించామని ఆయన ప్రశ్నించారు. ఎంపీని అయిన తన పైనే దొంగ కేసులు పెడితే ఈ వ్యవస్థ ఎప్పుడు బాగుపడుతుందని ఆవేదన వ్యక్తం చేశారు. పోలీసులు అమాయకులపై తప్పుడు కేసులు పెడుతున్నారని విమర్శించారు. పోలీసులు ఉన్నది ప్రజా సేవకన్నారు. న్యాయం చేయాలని అడిగినందుకే తనపై కేసు పెట్టారని విమర్శించారు. తమ ధర్నాకు సంబంధించిన విజువల్స్ తీసుకొని అన్ని మీడియా ఛానళ్లకు వెళతామని అలాగే హెచ్చార్సీని కూడా ఆశ్రయిస్తామని చెప్పారు. తాము పిఎస్ ముందు ఏం చేశామో మీడియాకు తెలుసన్నారు.

English summary

YSRC Party president YS Jaganmohan Reddy blamed Pulivendula police for case against him and his party leaders. He said he will go to HRC for justice.