ప్రభుత్వం పడకుండా సిఎం ఎమ్మెల్యేలను కొన్నాడు: కెటిఆర్

By Pratap

Published: Thursday, October 13, 2011, 13:33 [IST]

హైదరాబాద్: ముఖ్యమంత్రి కిరణ్ కుమార్ రెడ్డిపై తెలంగాణ రాష్ట్ర సమితి సిరిసిల్ల శాసనసభ్యుడు కల్వకుంట్ల తారక రామారావు గురువారం తీవ్రమైన వ్యాఖ్యలు చేశారు. ముఖ్యమంత్రి ప్రభుత్వం పడిపోకుండా ఉండటానికి పదమూడు మంది శాసనసభ్యులకు ఒక్కొక్కరికి 25 లక్షల రూపాయల చొప్పున డబ్బులు ఇచ్చి కొన్నారని ఓ సమావేశంలో ఆరోపించారు. ఈ అంశంపై సిబిఐ విచారణకు ఆదేశిస్తే తాను ఆధారాలు చూపించడానికి సిద్ధంగా ఉన్నానని చెప్పారు. ఎవరెవరికి డబ్బులు ఇచ్చారో తన వద్ద పూర్తి ఆధారాలు ఉన్నాయన్నారు. ఈ విషయంపై వెంటనే సిబిఐ విచారణ జరిపించాలని కోరారు. రాజకీయ నేతల్లో నిబద్ధత లేకే తెలంగాణ ఆలస్యమవుతోందన్నారు.

సీమాంధ్ర నేతలు తమ ఆధిపత్యం కోసం తెలంగాణ అడ్డుకుంటున్నారని భారతీయ జనతా పార్టీ రాష్ట్ర అధ్యక్షుడు కిషన్ రెడ్డి వేరుగా ఆరోపించారు. సీమాంధ్ర ప్రజలు తెలంగాణకు వ్యతిరేకంగా లేరని కేవలం రాజకీయ నేతలు మాత్రమే వ్యతిరేకంగా ఉన్నారన్నారు. నవంబరులో సీమాంధ్రలో జై ఆంధ్ర ఉద్యమం ప్రారంభిస్తామన్నారు. బిజెపి పరిస్థితి కత్తి మీద సాములా తయారయిందని ఆయన ఆవేదన వ్యక్తం చేశారు.

Published On October 13, 2011