స్కూళ్లు తెరిపించండి: సిఎంకు పేరెంట్స్ కమిటీ విజ్ఞప్తి

హైదరాబాద్: సకల జనుల సమ్మెలో భాగంగా విధులకు గైర్హాజరీ అవుతున్న ఉపాధ్యాయులతో, అధ్యాపకులతో మాట్లాడి వెంటనే పాఠశాలలు, కళాశాలలు తెరిపించాలని తల్లిదండ్రుల కమిటీ గురువారం ముఖ్యమంత్రి కిరణ్ కుమార్ రెడ్డిని కలిసి విజ్ఞప్తి చేసింది. సమ్మె కారణంగా విద్యాసంస్థలు తెరిచుకోక పోవటంతో సిలబస్ తగ్గించాలని కోరింది. విద్యాసంస్థల సమ్మెపై చర్యలు తీసుకొని విద్యార్థులు విద్యా సంవత్సరం నష్టపోకుండా చూడాలని కోరారు. ముఖ్యమంత్రిని కలిసిన తర్వాత వారు మీడియాతో మాట్లాడారు. బందుల నుండి విద్యాసంస్థలను మినహాయిస్తూ ప్రభుత్వం వెంటనే ప్రత్యేక చట్టం తీసుకోరావాలని సిఎంను కోరినట్లు చెప్పారు. విద్యార్థుల జీవితాలతో ఆడుకోవద్దని తెలంగాణవాదులను కోరారు. తాము తెలంగాణకు వ్యతిరేకంకాదన్నారు. వైన్ దుకాణాలు, సినిమా హాళ్లు, షాపింగ్ మాల్సు నడుస్తుంటే జెఏసి నేతలకు కనిపించడం లేదా అని ప్రశ్నించారు.

ఇప్పటికే ఉద్యమం కోసం తల్లిదండ్రులు నెల రోజుల అమూల్యమైన కాలాన్ని త్యాగం చేశారని ఇంకెన్ని రోజులు త్యాగం చేయమన్నా తాము సిద్ధమని కానీ విద్యార్థుల జీవితాలతో మాత్రం ఆడుకోవద్దన్నారు. ఈ నెల 15న జెఏసి నేతలు తీసుకునే నిర్ణయం అనంతరం బంద్ నుండి స్కూళ్లను మినహాయిస్తే హర్షిస్తామని లేకుంటే తామంతా సమావేశమై భవిష్యత్తు కార్యాచరణ రూపొందించుకుంటామని హెచ్చరించారు.

English summary

Parents committee met CM Kiran Kumar Reddy and appealed to open schools and colleges open.