ఎబివిపి మినిస్టర్స్ క్వార్టర్స్ ముట్టడి, అరెస్టు

By Srinivas

Published: Sunday, October 16, 2011, 11:35 [IST]

హైదరాబాద్: ప్రత్యేక తెలంగాణ రాష్ట్ర సాధనలో భాగంగా తెలంగాణ ప్రాంత మంత్రులు వెంటనే రాజీనామా చేయాలంటూ మంత్రుల క్వార్టర్స్‌ను అఖిల భారత విద్యార్థి పరిషత్(ఎబివిపి) కార్యకర్తలు ముట్టడించడం ఆదివారం తీవ్ర ఉధ్రిక్తతకు దారి తీసింది. మంత్రులు రాజీనామా చేయాలని డిమాండ్ చేస్తూ ఎబివిపి కార్యకర్తలు ఉదయం మినిస్టర్స్ క్వార్టర్స్‌ను ముట్టడించారు. వారిని బయటే పోలీసులు అడ్డుకునే ప్రయత్నాలు చేశారు. విద్యార్థులు ఎంతకూ వెనక్కి తగ్గక లోనికి చొచ్చుకెళ్లే ప్రయత్నం చేశారు. దీంతో పోలీసులు, విద్యార్థుల మధ్య వాగ్వాదం ఆ తర్వాత తోపులాట జరిగింది.

పరిస్థితి అదుపు తప్పుతుందని గ్రహించిన పోలీసులు పలువురు విద్యార్థులను అరెస్టు చేసి బంజారాహిల్స్ పోలీసుస్టేషన్‌కు తరలించారు. మరోసారి ఇలాంటి సంఘటనలు జరగకుండా మంత్రుల క్వార్టర్స్ వద్ద భారీ బందోబస్తును ఏర్పాటు చేశారు. కాగా శనివారం రైలు రోకో సందర్భంగా పలువురు తెలంగాణ ప్రాంత ప్రజాప్రతినిధుల అరెస్టును నిరసిస్తూ ఉస్మానియా విశ్వవిద్యాలయ ఐక్య కార్యాచరణ సమితి ఆదివారం చలో సీతాఫల్ మండికి పిలుపునిచ్చింది.

Published On October 16, 2011