పరారీలో కెసిఆర్, కోదండరాం: కోర్టులో చార్జీషీట్?

హైదరాబాద్: తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కల్వకుంట్ల చంద్రశేఖర రావు, తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరాం, శాసనసభ్యులు హరీష్ రావు, కల్వకుంట్ల తారక రామారావు, భారతీయ జనతా పార్టీ సీనియర్ నేత విద్యాసాగర్ రావు, ఉద్యోగ సంఘాల నేతలు స్వామిగౌడ్, విఠల్, దేవీప్రసాద్ తదితరులపై కరీంనగర్ జిల్లా రామగుండం పోలీసు స్టేషన్‌లో కేసు నమోదు చేశారు. వారంతా పరారీలో ఉన్నట్లు కోర్టులో చార్జీ షీట్ దాఖలు చేసినట్లుగా తెలుస్తోంది. శనివారం నుండి సోమవారం వరకు మూడు రోజుల పాటు తెలంగాణవ్యాప్తంగా రైలు రోకోకు ఐకాస పిలుపునిచ్చిన విషయం తెలిసిందే.

వారంతా ప్రజలను రెచ్చగొట్టేలా మాట్లాడారని ఆరోపిస్తూ కేసు నమోదు చేశారు. 143, 188, 506, 147, 157 తదితర సెక్షన్ల క్రింద కేసు నమోదు చేశారు. కాగా మరోవైపు తెలంగాణ కాంగ్రెసు పార్లమెంటు సభ్యుడు పొన్నం ప్రభాకర్, మాజీ మంత్రి జీవన్ రెడ్డిలను పోలీసులు కరీంనగర్ పోలీసు స్టేషన్‌కు తరలించారు. స్టేషన్ ఘన్‌పూర్ శాసనసభ్యుడు రాజయ్యకు కోర్టు ఏడు రోజుల రిమాండ్ విధించింది. ఆయనను సెంట్రల్ జైలుకు తరలించే అవకాశం ఉంది. ఖమ్మం జిల్లాలో కారేపల్లి మండలం న్యూడెమోక్రసీ ఆధ్వర్యంలో తెలంగాణవాదులు రైలు పట్టాలపై బైఠాయించడంతో మాజీ ఎమ్మెల్యే గుమ్మడి నర్సయ్యను పోలీసులు అరెస్టు చేశారు.

English summary

Ramagundam of Karimnagar district police booked case against TRS chief K Chandrasekhar Rao, TPJAC chairman Kodandaram, TNGO leaders Swamy Goud, Vittal and BJP leader Vidyasagar rao today.