రాత్రంతా తిప్పుతారా: రాములమ్మ అరెస్టుపై కోదండరాం

By Srinivas

Published: Sunday, October 16, 2011, 13:13 [IST]

హైదరాబాద్: తెలంగాణ రాష్ట్ర సమితి మెదక్ పార్లమెంటు సభ్యురాలు విజయశాంతిని రాత్రంతా కోర్టుల చుట్టూ తిప్పుతారా అని తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరామ్ ఆదివారం ప్రభుత్వాన్ని ప్రశ్నించారు. రైలు రోకోలో పాల్గొన్న మహిళా నేతలను సైతం రాత్రంతా పోలీసుల అదుపులో ఉంచుకోవడం ఎంత వరకు సమంజసమని ప్రశ్నించారు. పోలీసు తీరు ప్రైవేటు సెక్యూరిటీలా ఉందని ధ్వజమెత్తారు. తెలంగాణవాదులపై కేసుల విషయాన్ని లాయర్లు చూసుకుంటారని చెప్పారు. పోలీసులు చట్టాన్ని చేతుల్లోకి తీసుకుంటున్నారని విమర్శించారు. నేతలు పట్టాల పైకి వెళ్లడం నేరమేమీ కాదన్నారు. అరెస్టు చేసి తీవ్రమైన కేసులు పెట్టి జైలుకు పంపడం చాలా దారుణం అన్నారు.

రాష్ట్రంలో అరాచక ప్రభుత్వం కొనసాగుతోందన్నారు. ఇక నుండి మంత్రులపై ఒత్తిడి తెచ్చేలా కార్యాచరణ రూపొందిస్తామని చెప్పారు. సాయంత్రం ఐకాస సమావేశం జరుగుతుందని అందులో చలో హైదరాబాదుపై చర్చిస్తామని చెప్పారు. మంత్రి జానారెడ్డి సమ్మెను విరమించుకోవాలని కోరటం సరికాదన్నారు. తన వ్యాఖ్యలపై ఆయన వెంటనే సమాధానమివ్వాలని డిమాండ్ చేశారు. సమ్మె విరమించాలని చెప్పటం తెలంగాణకు ద్రోహం చేసినట్లేనన్నారు. ఓ మహిళ హోంమంత్రిగా ఉన్నప్పటికీ మహిళలను రాత్రంతా జైలులో ఉంచడం శోచనీయమన్నారు.

తెలంగాణ వచ్చే వరకు సకల జనుల సమ్మె కొనసాగిస్తామని స్పష్టం చేశారు. ఆర్టీసీలో తెలంగాణ నాయకత్వం ఎదగాల్సి ఉందన్నారు. అందుకే ఆర్టీసి సమ్మె వాయిదా వేసుకున్నట్లు చెప్పారు.

Published On October 16, 2011