ఎసి గదుల్లో ఉండి కెసిఆర్ పిలుపు: శైలజానాథ్

By Srinivas

Published: Sunday, October 16, 2011, 15:21 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, తెలంగాణ రాజకీయ ఐక్య కార్యాచరణ సమితి చైర్మన్ ఆచార్య కోదండరాంలు ఎసి గదులలో కూర్చొని ఉద్యమాలకు పిలుపునిస్తున్నారని మంత్రి శైలజానాథ్ ఆదివారం ఆరోపించారు. ఉద్యమంలో ఎక్కువగా బలవుతున్నది బిసిలు, బలహీనవర్గాలేనని ఆవేదన వ్యక్తం చేశారు. సకల జనుల సమ్మె పేరుతో చేస్తున్న ఉద్యమం దొరల కుట్రలో భాగమేనని దీనిని తెలంగాణ ప్రజలు గుర్తించాలని విజ్ఞప్తి చేశారు. రైలు రోకోలో పాల్గొన వద్దని అధిష్టానం కోరినప్పటికీ తెలంగాణ ప్రాంత పార్లమెంటు సభ్యులు పాల్గొన్నారని అది సరికాదన్నారు. వారిపై చట్టపరమైన చర్యలు ఉంటాయన్నారు. అయితే వారు వ్యక్తిగతంగానే ఉద్యమంలో పాల్గొన్నట్లు తాము భావిస్తున్నామని చెప్పారు.

మరోవైపు తెలంగాణలో జరుగుతున్న సకల జనుల సమ్మె ఉద్యమం కృత్రిమమైనదని సమైక్యాంధ్ర ఐక్య కార్యాచరణ సమితి చైర్మన్ ఆచార్య శ్యామ్యూల్ వేరుగా అన్నారు. తాము సమైక్యాంధ్ర కోసం ఉద్యమాన్ని ఉధృతం చేస్తామని చెప్పారు. కేంద్రం నిర్ణయం సమైక్యాంధ్రకు వ్యతిరేకంగా ఉంటే తీవ్ర పరిణామాలు ఉంటాయని హెచ్చరించారు. తెలంగాణ వారిలాగే తాము అన్ని రకాలుగా బలమైన వారమే అన్నారు.

Published On October 16, 2011