తెలంగాణ మంత్రులను కట్టడి చేసిన హైకమాండ్

By Pratap

Published: Wednesday, October 19, 2011, 19:45 [IST]

హైదరాబాద్: తమ పార్టీ తెలంగాణ స్టీరింగ్ కమిటీని దెబ్బ తీయడంలో కాంగ్రెసు అధిష్టానం కొంత మేరకు విజయం సాధించినట్లు చెబుతున్నారు. తెలంగాణకు చెందిన మంత్రులు స్టీరింగ్ కమిటీకి హాజరు కాలేదు. పార్టీ అధిష్టానం సూచనల మేరకే వారు తెలంగాణ స్టీరింగ్ కమిటీ సమావేశానికి రాలేదని అంటున్నారు. ఇటీవలి కాలంలో వారు తెలంగాణ ఉద్యమానికి కూడా దూరమైనట్లు కనిపిస్తున్నారు. అయితే, సీనియర్ మంత్రి కె. జానా రెడ్డి మాత్రం గడువు కన్నా గంట ముందే పార్లమెంటు సభ్యుడు కె. కేశవరావు నివాసానికి వెళ్లి కూర్చున్నారు. సమావేశానికి రాకపోతే తనపై తీవ్రమైన విమర్శలు వచ్చే ప్రమాదాన్ని గ్రహించి ఆయన జాగ్రత్త పడి సమావేశానికి వెళ్లినట్లు భావిస్తున్నారు. సమ్మె విరమించాలని తెలంగాణ ఉద్యోగులను కోరడంపై జానా రెడ్డి మీద సొంత పార్టీ నేతలు కూడా మండిపడుతున్న సమయంలో ఆయన తన తెలివినంతా ఉపయోగించినట్లు చెబుతున్నారు.

అయినప్పటికీ తెలంగాణ మంత్రుల తీరు పట్ల కాంగ్రెసు తెలంగాణ ప్రాంత పార్లమెంటు సభ్యులు స్టీరింగ్ కమిటీ సమావేశంలో తీవ్రంగా ధ్వజమెత్తారు. తాను సమావేశానికి వెళ్లకపోతే తనపై దాడి తీవ్రంగా ఉంటుందని గ్రహించి, దాన్ని తిప్పికొట్టడానికి మాత్రమే జానా రెడ్డి సమావేశానికి హాజరై, ముందుకు కేశవరావుతో మంతనాలు జరిపినట్లు చెబుతున్నారు. మంత్రులు రాజీనామా చేయాలని పార్లమెంటు సభ్యులన్నప్పుడు తెలంగాణ ఇస్తామంటే ఇప్పటికిప్పుడు తాను రాజీనామా చేస్తానని జానా రెడ్డి ఎదురుదాడికి దిగినట్లు చెబుతున్నారు. అయితే, జానా రెడ్డి కొంత ఆత్మరక్షణలో కూడా పడినట్లు కనిపిస్తున్నారు. మంగళవారం సాయంత్రం, బుధవారం మధ్యాహ్నం మాట్లాడిన తీరు ఆ విషయాన్ని తెలియజేస్తోంది.

Published On October 19, 2011