వైయస్ విజయమ్మ పిల్ వెనుక ఎవరున్నారో: డిఎల్

By Srinivas

Published: Wednesday, October 19, 2011, 14:55 [IST]

హైదరాబాద్: దివంగత ముఖ్యమంత్రి వైయస్ రాజశేఖర రెడ్డి సతీమణి, పులివెందుల శాసనసభ్యురాలు వైయస్ విజయమ్మ పిటిషన్ వెనుక ఎవరు ఉన్నారో తమకు తెలియదని ప్రాథమిక ఆరోగ్య శాఖ మంత్రి డిఎల్ రవీంద్రా రెడ్డి బుధవారం అన్నారు. వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి జైలుకు వెళ్లడం ఖాయమన్నారు. జగన్‌తో కాంగ్రెసు కుమ్మక్కు అనేది వట్టి మాటే అన్నారు. తెలుగుదేశం పార్టీ కాంగ్రెసుపై విష ప్రచారం చేస్తుందని ధ్వజమెత్తారు.

వైయస్ విజయమ్మ పిటిషన్‌కు తెలుగుదేశం పార్టీ అధినేత, మాజీ ముఖ్యమంత్రి నారా చంద్రబాబు నాయుడు సానుకూలంగా స్పందించాలన్నారు. ఆయన తన నిజాయితీ నిరూపించుకోవాలని డిమాండ్ చేశారు. తన శాఖపై మాట్లాడుతూ సీజనల్ వ్యాధుల నివారణకు ప్రభుత్వం చర్యలు తీసుకుంటుందని చెప్పారు. ప్రవేటు ఆసుపత్రులు కొన్నింటిలో విష ప్రచారం చేస్తున్నాయని అన్నారు. వైద్యాధికారులు, రోగులు వ్యాధుల పట్ల అప్రమత్తంగా ఉండాలన్నారు. నిమ్స్‌లో డిసెంబరులో ట్రామాకేర్ ఏర్పాటు చేస్తామని చెప్పారు.

Published On October 19, 2011