మాతో వస్తే తెలంగాణ తెస్తాం: కాంగ్రెసుకు ఎర్రబెల్లి

By Srinivas

Published: Wednesday, October 19, 2011, 16:57 [IST]

హైదరాబాద్: తెలంగాణ కాంగ్రెసు ప్రజాప్రతినిధులు రాజీనామాలు చేయడానికి తమతో కలిసి వస్తే తెలంగాణ తీసుకు వచ్చే బాధ్యత తమదేనని తెలంగాణ తెలుగుదేశం ఫోరం నేత ఎర్రబెల్లి దయాకర రావు బుధవారం కాంగ్రెసు నేతలకు సూచించారు. తెలంగాణ కోసం తాము రాజీనామాలు చేయడానికి సిద్ధమని మీరు కూడా సిద్ధపడాలని సూచించారు. తెలంగాణ వస్తే క్రెడిట్ ఎవరికో పోతుందనే ఆందోళన వద్దన్నారు. మీరు రాజీనామాలు చేశాక తెలంగాణ వంద శాతం వస్తుందని ఆ క్రెడిట్ తెలంగాణ రాష్ట్ర సమితికి పోదని మీకే వస్తుందన్నారు. తెలంగాణ కోసం ఉద్యమంలో కలిసి రాకపోతే ప్రజలు గ్రామాల్లో తిరగనివ్వరని హెచ్చరించారు. ఇళ్ల నుంచి గుంజి కొట్టే పరిస్థితి వస్తుందన్నారు.

ప్రత్యేక రాష్ట్రం కోసం తెలంగాణ ప్రజలు ఎన్ని ఇబ్బందులు ఎదుర్కోవడానికైనా సిద్ధంగా ఉన్నారన్నారు. సీమాంధ్ర ప్రాంతానికి చెందిన తెలుగుదేశం, కాంగ్రెసు ప్రజాప్రతినిధులు తమను రెచ్చగొట్టేలా మాట్లాడితే తీవ్ర పరిణామాలు ఉంటాయని హెచ్చరించారు. రాజీనామాలతో తెలంగాణ రాదన్న మంత్రి జానారెడ్డి వ్యాఖ్యలపై మండిపడ్డారు. తెలంగాణ మంత్రులు, శాసనసభ్యులు రాజీనామా చేస్తే ఖచ్చితంగా తెలంగాణ వచ్చి తీరుతుందన్నారు.

Published On October 19, 2011