రోజూ తాగే వారికే సమస్య: మందకృష్ణ మాదిగ

By Srinivas

Published: Wednesday, October 19, 2011, 13:00 [IST]

హైదరాబాద్: ప్రతిరోజూ మద్యం తాగే వారికే మద్య నిషేధం చాలా ఇబ్బందిగా మారుతుందని మాదిగ రిజర్వేష్ పోరాట సమితి అధ్యక్షుడు మందకృష్ణ మాదిగ బుధవారం మీడియా సమావేశంలో అన్నారు. తెలంగాణ రాష్ట్రం వచ్చాక దళిత ముఖ్యమంత్రి, మైనార్టీ ఉప ముఖ్యమంత్రి అని చెప్పిన తెలంగాణ రాష్ట్ర సమితి మద్య నిషేధం పైనా హామీ ఇవ్వాలని ఆయన డిమాండ్ చేశారు. తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుకు మద్యం వ్యాపారులపై ఉన్న ప్రేమ అణగారిన కులాల విద్యార్థుల పైన లేదన్నారు. అందుకే సకల జనుల సమ్మెలో విద్యాసంస్థలు బందు చేయించి మద్యం, హోటళ్లు, సినిమా హాళ్లు తెరిచేలా చూశారన్నారు.

ఎమ్మార్పీఎస్ అధ్వర్యంలో వచ్చే టెండర్ల నాటికి ప్రజల్లో మద్యం సేవిస్తే కలిగే సమస్యలపై అవగాహన కల్పించే కార్యక్రమాన్ని చేపడతామన్నారు. తెలంగాణ వచ్చాక తెలంగాణలో సంపూర్ణ మద్యంపై ప్రజలే ప్రశ్నించేలా చేస్తామన్నారు. తెలంగాణ కోసం ప్రముఖ స్వాతంత్ర్య సమర యోధుడు కొండా లక్ష్మణ్ బాపూజీ ఢిల్లీలో చేపట్టే దీక్షకు తాము మద్దతు పలుకుతున్నట్లు చెప్పారు. ఆయనకు మద్దతుగా తాను ఢిల్లీ వెళ్లి ఒక్కరోజు ఆయన దీక్షలో పాల్గొంటానని చెప్పారు. ఆయన సత్యాగ్రహానికి మద్దతుగా అన్ని మండల కేంద్రాల్లో ఆందోళన నిర్వహిస్తామన్నారు. తెలంగాణ ఏర్పడితే తొలి ముఖ్యమంత్రి అభ్యర్థి బాపూజీయే అన్నారు.

Published On October 19, 2011