జగన్‌కు రాయపాటి సలహా, కెసిఆర్‌పై విమర్శ

న్యూఢిల్లీ: గుంటూరు పార్లమంటు సభ్యుడు రాయపాటి సాంబశివ రావు బుధవారం వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి, తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావుపై విమర్శలు చేశారు. వైయస్ జగన్ పార్టీలో అందరూ ఒకే సామాజిక వర్గానికి ఉన్నట్లుగా కనిపిస్తోందని ఆయన అభిప్రాయపడ్డారు. ఎక్కడ ఫ్లెక్సీ చూసినా ఒకే సామాజిక వర్గానికి చెందిన ఫోటోలు కనిపిస్తున్నాయన్నారు. ఒక కులాన్ని పట్టుకొని పోతే మనుగడ సాధించడం కష్టమన్నారు. అన్ని వర్గాలను కలుపుకొని పోవడం వల్లనే కాంగ్రెసు, తెలుగుదేశం పార్టీలు మనుగడ సాగిస్తున్నాయని వైయస్సార్ కాంగ్రెసు పార్టీ కూడా అలాగే వెళితే బావుంటుందన్నారు.

సకల జనుల సమ్మె కేవలం తెలంగాణ రాష్ట్ర సమితి బలం పెంచుకోవడానికి మాత్రమేనని ఆయన ఆరోపించారు. ఇవ్వాలో రేపో తెలంగాణ వస్తుందని తెరాస చీఫ్ కెసిఆర్ చెప్పారని ఆయన మాటల ప్రకారం ఇప్పటికే తెలంగాణ వచ్చి ఉండాలని మరి వచ్చిందా అని ఆయన ప్రశ్నించారు. తెలంగాణపై కేంద్రం నిర్ణయానికి తామంతా కట్టుబడి ఉంటామని చెప్పారు.

English summary

Guntur MP Rayapati Sambasiva Rao suggested YSR Congress Party president YS Jaganmohan Reddy to strengthen his party.