సుప్రీంకోర్టులో తమిళ సిఎం జయలలితకు చుక్కెదురు

న్యూఢిల్లీ: తమిళనాడు ముఖ్యమంత్రి జయలలితకు సుప్రీంకోర్టులో బుధవారం చుక్కెదురైంది. వ్యక్తిగత హాజరు నుంచి తనకు మినహాయింపు ఇవ్వాలని ఆమె దాఖలు చేసుకున్న పిటిషన్‌ను సుప్రీంకోర్టు తోసిపుచ్చింది. బెంగళూర్ ట్రయల్ కోర్టు ముందు వ్యక్తిగత హాజరు కావాలని సుప్రీంకోర్టు జయలలితను ఆదేశించింది. తనకు ప్రాణభయం ఉందని, అందువల్ల వ్యక్తిగత హాజరు నుంచి మినహాయింపు ఇవ్వాలని ఆమె సుప్రీంకోర్టుకు నివేదించుకున్నారు. తగిన భద్రతతో కోర్టుకు వెళ్లాలని, వ్యక్తిగత హాజరు నుంచి మినహాయింపు కుదరదని సుప్రీంకోర్టు తేల్చి చెప్పింది.

జయలలితకు తగిన భద్రతకు ఏర్పాట్లు చేశామని కర్ణాటక ప్రభుత్వ ప్రధాన కార్యదర్శి, పోలీసు డైరెక్టర్ జనరల్ చెప్పిన తర్వాత వ్యక్తిగతంగా కోర్టుకు హాజరు కావాలని జస్టిస్ దల్వీర్ భండారీ, జస్టిస్ దీపక్ మిశ్రాలతో కూడిన సుప్రీంకోర్టు బెంచ్ చెప్పింది. కోర్టుకు హాజరు కావడానికి తగిన భద్రత ఉన్నట్లు కనిపించడం లేదని, తనకు ట్రయల్ కోర్టు ముందు వ్యక్తిగతంగా హాజరు కావడం నుంచి మినహాయింపు ఇవ్వాలని జయలలిత మంగళవారం సుప్రీంకోర్టులో పిటిషన్ దాఖలు చేశారు.

English summary

In a setback to Tamil Nadu Chief Minister J Jayalalitha, the Supreme Court on Wednesday declined her plea and directed her to appear before a trial court in Bangalore to record her statement in a corruption case.