అద్వానీపై సమైక్యవాదుల ధ్వజం, దిష్టిబొమ్మ దగ్ధం

By Srinivas

Published: Wednesday, October 19, 2011, 11:29 [IST]

న్యూఢిల్లీ/హైదరాబాద్: భారతీయ జనతా పార్టీ అగ్రనేత లాల్ కృష్ణ అద్వానీపై సీమాంధ్ర ప్రజా ప్రతినిధులు బుధవారం విరుచుకు పడ్డారు. అఖండ భారతాన్ని కోరుకునే అద్వానీ ఆంధ్ర ప్రదేశ్‌లో మాత్రం ప్రాంతీయ విద్వేషాలు రెచ్చగొట్టడం సరికాదని మంత్రి శైలజానాథ్ ఢిల్లీలో అన్నారు. కాంగ్రెసు ప్రజాప్రతినిధులు ఎవరూ తెలంగాణ రాష్ట్ర సమితి పార్టీలో చేరరన్నారు. ప్రత్యేక రాష్ట్రాల ఏర్పాటు జరగాల్సింది శాస్ర్తీయ పద్ధతిలో జరగాలే కానీ సమ్మెలతో కాదన్నారు. తెలంగాణ విషయంలో భారతీయ జనతా పార్టీ తీరు ఇలాగే ఉంటే సీమాంధ్రలో ఆ పార్టీకి నూకలు చెల్లినట్లేనని మాజీ మంత్రి, తెదేపా నేత యనమల రామకృష్ణుడు హెచ్చరించారు. ఆంధ్ర ప్రదేశ్ రాష్ట్రం ఏర్పడటానికి అసెంబ్లీలో తీర్మానాలు చేసినట్లుగానే విడిపోవడానికి కూడా తీర్మానం చేయాలన్నారు.

అద్వానీ రథయాత్ర అవినీతిపై చేసినట్లుగా లేదని తెలంగాణ కోసం చేసినట్లుగా ఉందని ఎద్దేవా చేశారు. తెలంగాణపై సానుకూల సంకేతాలు కేంద్రం నుండి వస్తున్నాయన్న తెలంగాణ కాంగ్రెసు నేతల ప్రకటనను ఆర్థిక శాఖ మంత్రి ఆనం రామనారాయణ రెడ్డి కొట్టి పారేశారు. సంకేతాలు వారి సొంత అభిప్రాయమే అన్నారు. కేంద్రం అన్ని భాగస్వామ్య పక్షాలతో చర్చించిన తర్వాతే నిర్ణయం ప్రకటిస్తుందన్నారు. శ్రీకాళహస్తిలో పూజలు చేసిన అనంతరం ఆయన మీడియాతో మాట్లాడారు.

విశాఖపట్నంలో సమైక్యాంధ్ర పరిరక్షణ సమితి కార్యకర్తలు అద్వాని దిష్టి బొమ్మను దగ్ధం చేశారు. తెలంగాణపై అద్వాని తీరు సరిగా లేదన్నారు. ఆయన హోంమంత్రిగా ఉన్నప్పుడు నరేంద్రకు తెలంగాణ అవసరం లేదంటూ లేఖ రాశారని ఇప్పుడు మాత్రం తెలంగాణ అంటూ రాగం అందుకున్నారని విమర్శఇంచారు.

Published On October 19, 2011