కలత చెంది జైలుకే వెళ్తానంటున్న యడ్యూరప్ప

By Pratap

Published: Wednesday, October 19, 2011, 10:36 [IST]

బెంగళూరు: తీవ్రంగా కలత చెందిన కర్ణాటక మాజీ ముఖ్యమంత్రి యడ్యూరప్ప జైలుకు వెళ్లాలని అనుకుంటున్నారు. భూ కుంభకోణంలో ఇరుక్కున్న ఆయన ప్రస్తుతం ఆస్పత్రిలో చికిత్స పొందుతున్నారు. తనపై తమ పార్టీ అగ్రనేత ఎల్‌కె అద్వానీ చేసిన వ్యాఖ్యలకు యడ్యూరప్ప తీవ్రంగా కలత చెందినట్లు భావిస్తున్నారు. యడ్యూరప్ప వ్యవహారాన్ని ప్రస్తావిస్తూ అవినీతి పార్టీని బలహీనపరుస్తుందని అద్వానీ మంగళవారం వ్యాఖ్యానించారు. భూ కుంభకోణం కేసులో అరెస్టయిన యడ్యూరప్పకు కోర్టు ఈ నెల 22వ తేదీ వరకు జ్యుడిషియల్ రిమాండ్ విధించింది.

ఛాతీ నొప్పి వస్తుందని చెప్పడంతో ఆదివారం ఉదయం యడ్యూరప్పను ప్రభుత్వ ఆధ్వర్యంలోని జయదేవ కార్జియాలజీ ఇనిస్టిట్యూట్‌లో చేర్చారు. యడ్యూరప్ప గుండె సజావుగానే పనిచేస్తోందని ఇనిస్టిట్యూట్ తేల్చి చెప్పింది. దీంతో ఆయనను ప్రభుత్వ ఆధ్వర్యంలోని విక్టోరియా ఆస్పత్రికి మార్చారు. తద్వారా జైలుకు వెళ్లడాన్ని యడ్యూరప్ప వాయిదా వేస్తూ వస్తున్నారనే విమర్శలు కూడా చుట్టుముట్టాయి. ఈ మేరకు టీవీ చానెళ్లలో వార్తలు వచ్చాయి. దీంతో కలత చెందిన యడ్యూరప్ప తాను జైలుకు వెళ్లాలని నిర్ణయించుకున్నట్లు రాష్ట్ర గృహ నిర్మాణ శాఖ మంత్రి సోమన్న చెప్పారు. తనను మోసగాడిగా చూస్తున్నారని యడ్యూరప్ప ఆవేదన వ్యక్తం చేశారని అంటున్నారు.

Published On October 19, 2011