వైయస్ జగన్ ఇంటి విలువ లెక్కిస్తున్నాం: సిబిఐ ఎస్పీ

By Srinivas

Published: Thursday, October 20, 2011, 17:20 [IST]

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి ఇంటి విలువను లెక్కిస్తున్నామని సెంట్రల్ బ్యూరో ఆఫ్ ఇన్వెస్టిగేషన్ ఎస్పీ వెంకటేష్ గురువారం చెప్పారు. శుక్రవారం కూడా ఇంటి విలువ అంచనా కొనసాగిస్తామని చెప్పారు. ఇంటి విలువను లెక్కించడానికి వివిధ శాఖల అధికారుల సహాయాన్ని తీసుకున్నామని చెప్పారు. ఎన్ని ఆస్తులు ఉన్నాయో ఇప్పుడే చెప్పలేమని మరికొందరు సహాయం తీసుకొని పూర్తైన తర్వాత తెలుస్తుందన్నారు.

కాగా జగన్మోహన్ రెడ్డి ఇంటికి గురువారం సిబిఐ అధికారులు వెళ్లారు. హైదరాబాదులోని లోటస్ పాండులో ఉన్న ఆయన ఇంటికి సిబిఐ అధికారులతో పాటు, నేషనల్ రిమోట్ సెన్సింగ్ ఏజెన్సీ(ఎన్ఆర్ఎస్ఏ), ఐటి అధికారులు, జిహెచ్ఎంసీ అధికారులు చేరుకున్నారు. ఎన్ఆర్ఎస్ఏ సహకారంతో జగన్ ఇంటి నిర్మాణాన్ని, దాని ఖర్చును అంచనా వేశారు. ఈ అంశంపై నగర ప్రణాళికా అధికారులను విచారించనున్నారని సమాచారం. అలాగే ఇంటి నిర్మాణం నియమ నిబంధనలకు అనుగుణంగానే ఉందా లేదా అనే అంశాన్ని కూడా పరిశీలించినట్లు సమాచారం.

Published On October 20, 2011