తెలంగాణకు కౌంట్‌డౌన్ ప్రారంభం: టిజి వెంకటేష్

By Srinivas

Published: Thursday, October 20, 2011, 15:16 [IST]

కర్నూలు/న్యూఢిల్లీ: తెలంగాణ సమస్యకు కేంద్రం కౌంట్ డౌన్ ప్రారంభించిందని చిన్న నీటి పారుదల శాఖ మంత్రి టిజి వెంకటేష్ గురువారం అన్నారు. కేంద్రం తెలంగాణ సమస్య పరిష్కారం కోసం ప్రయత్నిస్తోందని ఈ రోజు నుండి కౌంట్ డౌన్ ప్రారంభించిందన్నారు. ఎన్నికలు వచ్చినప్పుడే తెలంగాణ సమస్య పరిష్కారమవుతుందని చెప్పారు. తెలంగాణలో సకల జనుల సమ్మె కేవలం రాజ్యాధికారం కోసమే అన్నారు. సమ్మె ద్వారా వారు తమ ఉనికిని చాటుకున్నారు కాని లక్ష్యం సాధించ లేక పోయారన్నారు.

మరోవైపు ఆంధ్ర ప్రదేశ్‌లో ముఖ్యమంత్రి మార్పు ఉండదని మంత్రి శైలజానాథ్ అన్నారు. సిఎం కిరణ్ కుమార్ రెడ్డిని మారుస్తారనే వ్యాఖ్యలు కేవలం ఊహాజనితమే అన్నారు. అందులో ఎలాంటి వాస్తవం లేదన్నారు. రాష్ట్రంలో అభివృద్ధి కుంటుపడలేదని చెప్పారు. రాష్ట్ర విభజనపై ఒక్క క్షణంలో నిర్ణయాలు సాధ్యం కావని చెప్పారు. తెలంగాణపై భారతీయ జనతా పార్టీ సీనియర్ నేత లాల్ కృష్ణ అద్వానీ ఆచరణ సాధ్యం కాని హామీలు ఇస్తున్నారని అభిప్రాయపడ్డారు.

Published On October 20, 2011