తెలంగాణ రాష్ట్రం రాదు: కావూరి సాంబశివ రావు

ఏలూరు/విజయవాడ: ప్రత్యేక తెలంగాణ వచ్చే సమస్యే లేదని పార్లమెంటు సభ్యుడు కావూరి సాంబశివ రావు గురువారం కృష్ణా జిల్లాలో అన్నారు. ఉద్యమాల ద్వారా ప్రత్యేక రాష్ట్రాన్ని సాధించడం అసాధ్యమన్నారు. రాష్ట్రం ఎప్పటికీ సమైక్యంగానే ఉంటుందని చెప్పారు. ఆంధ్రప్రదేశ్ విడిపోయేది లేదన్నారు. భారతీయ జనతా పార్టీ అగ్రనేత ఎల్ కే అద్వానీ రాజకీయ ప్రయోజనాల కోసమే తెలంగాణ ఇస్తామని చెబుతున్నారని ఆరోపించారు. మరోవైపు సీమాంధ్ర న్యాయవాదుల ఆధ్వర్యంలో త్వరలో బెజవాడలో భారీ బహిరంగ సభ ఏర్పాటు చేయనున్నట్లు సీమాంధ్ర న్యాయవాదుల ఐక్య కార్యాచరణ సమితి పేర్కొంది.

నవంబరు 1వ తేదీలోగా కేంద్ర, రాష్ట్ర ప్రభుత్వాలు సమైక్యాంధ్రకు అనుకూలంగా నిర్ణయం తీసుకోవాలని డిమాండ్ చేశారు. సమైక్యాంధ్ర కోసం విద్యార్థి సేనను ఏర్పాటు చేస్తామని చెప్పారు. సమైక్యవాదులపై ప్రభుత్వం పెట్టిన కేసులు వెంటనే ఎత్తి వేయాలని వారు డిమాండ్ చేశారు. న్యాయవాద వృత్తికి అపవాదు తీసుకు వచ్చేలా తెలంగాణ న్యాయవాదుల తీరు ఉందని విమర్శించారు. రాష్ట్రాన్ని విడగొట్టాలని చూస్తే తీవ్ర పరిణామాలు ఉంటాయని హెచ్చరించారు. తెలంగాణపై ప్రధాని మన్మోహన్ సింగ్ చేసిన వ్యాఖ్యలను వారు స్వాగతించారు.

English summary

MP Kavuri Sambasiva Rao said today that Telangana state will not come. State will not divide.