పోలవరం కోసం సిఎంతో కెసిఆర్ కుమ్మక్కు: రేవంత్

By Srinivas

Published: Thursday, October 20, 2011, 14:43 [IST]

హైదరాబాద్: తెలంగాణ రాష్ట్ర సమితి అధ్యక్షుడు కల్వకుంట్ల చంద్రశేఖర రావు, తెలంగాణ రాజకీయ ఐక్య కార్యాచరణ సమితి చైర్మన్‌పై తెలుగుదేశం పార్టీ శాసనసభ్యుడు రేవంత్ రెడ్డి గురువారం తీవ్రస్థాయిలో విరుచుకు పడ్డారు. కెసిఆర్ సకల జనుల సమ్మెను వ్యాపారంగా మార్చారని దుయ్యబటడ్టారు. కెసిఆర్, కోదండరాం ముఖ్యమంత్రి కిరణ్ కుమార్ రెడ్డితో సమ్మె విరమిస్తామని ఒప్పందం చేసుకొని నమస్తే తెలంగాణ పత్రికలో పెట్టుబడులు పెట్టిన వారికి పోలవరం కాంట్రాక్టులు ఇప్పించుకున్నారని ఆరోపించారు. అందుకే పోలవరం కదిలిందని ఆ పత్రికలో ప్రచురించారన్నారు. ఆ కంపెనీ కూడా కెసిఆర్ బినామీ కంపెనీయేనన్నారు. ప్రభుత్వం అర్హత లేని కంపెనీలకు పోలవరం కాంట్రాక్టులు అప్పగిస్తుందన్నారు.

పోలవరం కడితే రక్తం ఏరులై పారుతుందన్న వారు ఇప్పుడు కాంగ్రెసు పార్టీతో కుమ్మక్కై తెలంగాణ ఉద్యమాన్ని తాకట్టు పెట్టారని విమర్శించారు. పోలవరం కదిలింది సమ్మె ఆగింది దీని వెనుక ఉన్న దురుద్దేశ్యాన్ని తెలంగాణ ప్రజలు, ఉద్యోగులు అర్థం చేసుకోవాలని ఆయన కోరారు. కాంగ్రెసు, టిఆర్ఎస్ అంతర్గత ఒప్పందంతో సమ్మె విరమింపజేశారన్నారు. ఉద్యమాన్ని చల్లబర్చుతామని కిరణ్‌కు మాట ఇచ్చారని ఆరోపించారు. ఉద్యమం ముసుగులో ఒప్పందాలను తాము బయట పెడుతున్నామని దీనిని అందరూ అర్థం చేసుకుంటారన్నారు.

Published On October 20, 2011