గాలి శ్రీవారికి ఇచ్చిన వజ్ర కిరీటంపై సిబిఐ ఆరా

By Srinivas

Published: Thursday, October 20, 2011, 16:36 [IST]

హైదరాబాద్: కర్నాటక మాజీ మంత్రి, భారతీయ జనతా పార్టీ సీనియర్ శాసనసభ్యుడు గాలి జనార్ధన్ రెడ్డి తిరుమల తిరుపతి దేవస్థానానికి ఇచ్చిన వజ్రాల కిరీటం గురించి గురువారం సిబిఐ అధికారులు ఆరా తీశారు. వేంకటేశ్వర స్వామికి బహూకరించిన కిరీటంపై వివరాలు అందజేయడానికి తిరుమల తిరుపతి దేవస్థానం ఈవో ఎల్ వి సుబ్రహ్మణ్యం సిబిఐ అధికారుల ముందు హాజరయ్యారు. పూర్తి వివరాలు అందజేశారు. కాగా 2010లో గాలి జనార్ధన్ రెడ్డి వజ్రాల కిరీటాన్ని ఏడుకొండల వాడికి సమర్పించిన విషయం తెలిసిందే. గాలి అరెస్టు తర్వాత ఆ కిరీటం అక్రమ సొమ్ముతో చేసి ఇచ్చింది కాబట్టి వెనక్కి తిరిగి ఇవ్వాలన్న వాదనలు ఊపందుకున్న విషయం తెలిసిందే.

కాగా గురువారం ఉదయం నలభై మందితో కూడిన సిబిఐ బృందం ఓబుళాపురం మైనింగ్ వ్యవహారాలపై మరింత వేగవంతంగా విచారణ చేయడానికి బళ్లారి వెళ్లిన విషయం తెలిసిందే. ఓఎంసిలో అధికారులు పర్యటించారు. బళ్లారిలోనూ మరో కార్యాలయాన్ని ఏర్పాటు చేసి విచారణ చేయాలని నిర్ణయించుకున్నారు. మరోవైపు ఎమ్మార్ కేసులో ఎస్‌బిఐ ప్రతినిధులు సిబిఐ ముందు హాజరయ్యారు.

Published On October 20, 2011