కేంద్రమంత్రి పురంధేశ్వరికి యార్లగడ్డ లక్ష్మీ ప్రసాద్ లేఖ

By Srinivas

Published: Thursday, October 20, 2011, 8:46 [IST]

న్యూఢిల్లీ: తెలుగు భాష అధ్యయన కేంద్రాన్ని మైసూరులో ఏర్పాటు చేయడం పట్ల పునరాలోచన చేయాలని కోరుతూ ప్రముఖ రచయిత యార్లగడ్డ లక్ష్మీ ప్రసాద్ బుధవారం కేంద్ర మంత్రి పురంధేశ్వరికి లేఖ రాశారు. ఈ సందర్భంగా ఆయన న్యూఢిల్లీలోని ఎపి భవన్‌లో విలేకరులతో మాట్లాడారు. తెలుగు భాష అధ్యయన కేంద్రాన్ని మన రాష్ట్రంలోనే ఏర్పాటు చేయాలని ఆయన కోరారు. సొంత రాష్ట్రాన్ని వదిలి మైసూరులో ఏర్పాటు చేయడం సరికాదన్నారు. మైసూరులోని భారతీయ భాషల కేంద్రంలోనే తెలుగు భాషా కేంద్రాన్ని ఏర్పాటు చేస్తున్నప్పటికీ అక్కడ తెలుగు భాషకు సముచిత ప్రాధాన్యత లభించడం లేదన్నారు. రాష్ట్రంలో ఏర్పాటు చేయాలని గతంలో అసెంబ్లీ కూడా ఏకగ్రీవ తీర్మానం చేసినట్లు చెప్పారు.

మైసూరలోని భారతీయ భాషల కేంద్రంలో గత పదేళ్లుగా దూరవిద్య ద్వారా తెలుగు కోర్సును నిలిపి వేశారని, ఏడేళ్ల క్రితం ప్రారంభించిన మందాకిని ప్రాజెక్టులో తెలుగు భాషను తొలగించి బెంగాళీని చేర్చారని, జాతీయ అనువాద మిషన్‌లో పాలుపంచుకున్న సుమారు వందమంది భాషా కోవిదుల్లో తెలుగు వారు ముగ్గురే ఉన్నారని, ఎల్డీసిఐఎల్‌లోనూ డెబ్బై మందికి ఒక్కరే తెలుగు వారు ఉన్నారని ఇలా ప్రతి విషయంలోనూ తెలుగుకు అక్కడ అన్యాయం జరుగుతోందన్నారు. ఈ పరిస్థితిని సవరించాల్సి ఉందని ఆయన పురంధేశ్వరిని కోరారు.

Published On October 20, 2011