ఎమ్మార్ కేసులో బొత్సను విచారించిన సిబిఐ

By Srinivas

Published: Friday, October 21, 2011, 9:08 [IST]

హైదరాబాద్: ఎమ్మార్ కేసు వ్యవహారంలో సిబిఐ అధికారులు గురువారం ప్రస్తుత ప్రదేశ్ కాంగ్రెసు కమిటీ అధ్యక్షుడు, దివంగత ముఖ్యమంత్రి వైయస్ రాజశేఖర రెడ్డి హయాంలో భారీ పరిశ్రమల శాఖ మంత్రిగా ఉన్న బొత్స సత్యనారాయణను విచారించినట్లుగా సమాచారం. మంత్రి నివాసానికి వెళ్లిన అధికారులు గంటన్నరపాటు ఆయన నుంచి పలు విషయాలను రాబట్టారని తెలిసింది. వేల కోట్ల ఎమ్మార్ కుంభకోణంలో ప్రభుత్వ వాటాను మొదట నిర్ణయించింది ఎవరు? అనంతరం అది ఎందుకు తగ్గింది? వైఎస్ ప్రభుత్వంలో మంత్రిగా ఈ విషయాన్ని మీరు ఎలా నిర్ణయించారు? కచ్చితమైన నిబంధనలు పాటించారా? కేబినెట్ సమావేశంలో ఈ అంశం చర్చకు వచ్చిందా? అప్పటి మంత్రులెవరైనా దీనిని వ్యతిరేకించారా? తదితర ప్రశ్నలు వేసినట్లు సమాచారం.

ఆయన ఇచ్చిన సమాచారం ఆధారంగా టీటీడీ ఈవో ఎల్వీ సుబ్రమణ్యం (గతంలో ఏపీఐఐపీ ఎండీ)ను గురువారం సీబీఐ అధికారులు హైదరాబాద్‌కు పిలిపించారు. అప్పట్లో ఆయన ఇచ్చిన జీవోల గురించి ప్రశ్నించినట్లు తెలిసింది. సుమారు గంటన్నర పాటు ఎల్‌వీ సుబ్రహ్మణ్యం సీబీఐ అధికారులతో మాట్లాడారని, అవసరమైతే మరోసారి హాజరవ్వాలని వారు కోరారని తెలుస్తోంది. మంత్రి బొత్స, సుబ్రహ్మణ్యం చెప్పిన అంశాలు సరిపోయాయా లేదా అని చూసుకున్న అధికారులు ఈ కుంభకోణం వెనుక ఎవరి పాత్ర ఉందన్న విషయాన్ని దాదాపు పసిగట్టి కీలక ఆధారాలు సేకరించినట్లు సమాచారం.

Published On October 21, 2011