ఓఎంసిపై సబిత ఇంద్రారెడ్డిని ప్రశ్నించనున్న సిబిఐ

By Srinivas

Published: Saturday, October 22, 2011, 11:02 [IST]

హైదరాబాద్: ఓబుళాపురం మైనింగ్ వ్యవహారంలో సిబిఐ అధికారులు హోంమంత్రి సబితా ఇంద్రా రెడ్డిని విచారించే అవకాశాలు కనిపిస్తున్నాయి. దివంగత ముఖ్యమంత్రి వైయస్ రాజశేఖర రెడ్డి హయాంలో ఆమె గనుల శాఖ మంత్రిగా పని చేసిన విషయం తెలిసిందే. దీంతో ఓబుళాపురం గనుల కేసులో ఆమెను సిబిఐ ప్రశ్నించే అవకాశం ఉంది. ఇప్పటికే ప్రస్తుత ప్రదేశ్ కాంగ్రెసు కమిటీ అధ్యక్షుడు, నాటి పరిశ్రమల శాఖ మంత్రి బొత్స సత్యనారాయణను సిబిఐ అధికారులు ఎమ్మార్ కేసు విషయంలో ప్రశ్నించారు. దీంతో గనుల వ్యవహారంలో సబితా వాంగ్మూలం తీసుకునే అవకాశాలు కనిపిస్తున్నాయి. ఆమె గనుల శాఖ మంత్రిగా ఉన్నప్పుడే ఓఎంసి లీజులు మంజూరయ్యాయి. ఈ విషయాన్ని నిర్ధారించుకునేందుకు ఆమెను ప్రశ్నించే అవకాశముంది.

కాగా ఓబుళాపురం మైనింగ్ కేసు వ్యవహారంలో ఇప్పటికే అప్పటి గనుల శాఖ కార్యదర్శి శ్రీలక్ష్మిని సిబిఐ విచారించిన విషయం తెలిసిందే. ఆమె వాంగ్మూలం తీసుకోవటంతో పాటు ఆమె ఇంట్లో సోదాలు నిర్వహించారు. నాటి గనుల శాఖ ఎండి రాజగోపాల్ ఇంట్లోనూ సోదాలు నిర్వహించారు. ఈ కేసులో కొద్ది రోజుల్లో ఛార్జీషీటు నమోదు చేయాల్సి ఉంది. దీంతో నాడు గనుల మంత్రిగా ఉన్న సబితను విచారించేందుకు సిబిఐ సన్నాహాలు చేస్తున్నట్లు తెలుస్తోంది. బొత్సను విచారించిన మాదిరే ఆమె ఇంటికి ప్రత్యేక బృందం వెళ్లి విచారించే అవకాశముంది.

Published On October 22, 2011