కిరణ్‌కు గడాఫీ గతే, బాబుకు దమ్ముంటే రావాలి: నాగం

By Srinivas

Published: Saturday, October 22, 2011, 15:12 [IST]

హైదరాబాద్: తెలంగాణపై ముఖ్యమంత్రి కిరణ్ కుమార్ రెడ్డి వైఖరి ఇలాగే ఉంటే ఆయనకు లిబియా నియంత ముమ్మార్ గడాఫీకి పట్టిన గతే పడుతుందని తెలంగాణ నగారా సమితి చైర్మన్ నాగం జనార్ధన్ రెడ్డి శనివారం హెచ్చరించారు. తెలంగాణ కోసం తెలంగాణ విద్యుత్ ఉద్యోగులు చేస్తున్న మూడు రోజుల నిరశన దీక్షకు నాగం, ఎమ్మెల్యేలు హరీశ్వర్ రెడ్డి, వేణుగోపాల చారి హాజరయ్యారు. ఈ సందర్భంగా నాగం మాట్లాడారు. రాజకీయ పార్టీల వైఫల్యం కారణంగానే సకల జనుల సమ్మె క్రమంగా సడలుతోందన్నారు. తెలంగాణ ఉద్యమం క్రమంగా బలహీనపడుతోందన్న చంద్రబాబు వ్యాఖ్యలపై ఆయన మండిపడ్డారు. ఉద్యమం చల్లబడినట్లు చంద్రబాబు భావిస్తే తెలంగాణలోని జిల్లాలో పర్యటించాలన్నారు. బాబుకు దమ్ముంటే తెలంగాణలో పర్యటించి ఉద్యమం చల్లబడిందని చెప్పాలన్నారు.

హరీశ్వర్ రెడ్డి మాట్లాడుతూ తెలంగాణ కోసం ఇంత పెద్ద ఎత్తున ఉద్యమం జరుగుతుంటే ప్రభుత్వానికి చీమ కుట్టినట్లు కూడా లేదని విమర్శించారు. కేంద్ర ప్రభుత్వం వెంటనే తెలంగాణ అంశాన్ని తేల్చాలని డిమాండ్ చేశారు. పోలవరం ప్రాజెక్టు కడితే గిరిజనులకు నష్టం జరుగుతుందన్నారు. వ్యవసాయానికి సరిపడా విద్యుత్ అందుబాటులో ఉన్నప్పటికీ కేవలం రైతులకు విద్యుత్ ఉద్యోగులపై ఆగ్రహం తెప్పించి తద్వారా ఉద్యమాన్ని దెబ్బతీయాలనే కుట్రతోనే ప్రభుత్వం విద్యుత్ ఇవ్వడం లేదని ఉద్యోగులు అభిప్రాయపడ్డారు. ఇలాంటి కుట్రలు సరి కావన్నారు.

Published On October 22, 2011