తెలంగాణ ఇప్పటికిప్పుడు పరిష్కారం కాదు: ఆజాద్

By Srinivas

Published: Sunday, October 23, 2011, 12:43 [IST]

న్యూఢిల్లీ: తెలంగాణ సమస్య ఇప్పటికిప్పుడు పరిష్కారం కాదని కేంద్ర మంత్రి, రాష్ట్ర వ్యవహారాల ఇంచార్జ్ గులాం నబీ ఆజాద్ ఆదివారం న్యూఢిల్లీలో అన్నారు. తెలంగాణ సమస్య పరిష్కారానికి కేంద్రం, కాంగ్రెసు చిత్తశుద్ధితో పని చేస్తున్నాయని అయితే ప్రస్తుత పరిస్థితుల్లో ఇప్పుడే పరిష్కారం సాధ్యం కాదన్నారు. త్వరలో పరిష్కారమవుతుందన్నారు. దీపావళి, బక్రీద్ పండుగ ఉన్న దృష్ట్యా తెలంగాణలో ఉద్యోగులు సకల జనుల సమ్మెను విరమించాలని విజ్ఞప్తి చేశారు. తాను కేంద్రం, కాంగ్రెసు తరఫున విరమించాలని కోరుతున్నానన్నారు. సమ్మె ద్వారా ప్రజలు తీవ్ర ఇబ్బందులు ఎదుర్కొంటున్నారన్నారు. సామాన్యులకు ఎలాంటి ఇబ్బందులు కలిగించ వద్దని కోరారు. దీర్ఘ కాలిక సమ్మెల ద్వారా రాష్ట్ర అభివృద్ధి కుంటు బడుతుందన్నారు. ఉద్యమాలతో అభివృద్ధి ఆగిపోయిందన్నారు.

ఇరవై మూడు నెలలుగా తెలంగాణ, రాయలసీమ, ఆంధ్ర మూడు ప్రాంతాల నేతలతో చర్చలు జరిపామన్నారు. ఇక జాతీయస్థాయిలో చర్చ జరగాల్సి ఉందన్నారు. అవి కూడా ప్రారంభమయ్యాయని చెప్పారు. తెలంగాణ సమస్య పరిష్కారానికి కేంద్రం చేస్తున్న కృషిని అందరూ అర్థం చేసుకోవాలని కోరారు. రాష్ట్రంలో పరిస్థితులు క్రమంగా మెరుగు పడుతున్నాయన్నారు. ఇప్పటికే విద్యాసంస్థలు తెరుచుకున్నాయన్నారు. కాగా అంతకుముందు ముఖ్యమంత్రి కిరణ్ కుమార్ రెడ్డి ఆజాద్‌తో గంట పాటు భేటీ అయ్యారు. రాష్ట్ర పరిస్థితులు, సమ్మెపై చర్చించారు. దీపావళి వరకు రాష్ట్రంలో పరిస్థితులు సద్దుమణుగుతాయాని హామీ ఇచ్చారు. సమ్మె విరమించాలని కేంద్రం తరఫున కోరాలని చెప్పారు.

Published On October 23, 2011