నలబైయ్యేళ్ల మహిళపై గ్యాంగ్ రేప్, కూతురు హత్య

By Srinivas

Published: Tuesday, October 25, 2011, 10:49 [IST]

లక్నో: నలబయ్యేళ్ల మహిళపై అత్యాచారానికి పాల్పడి, ఆమె కూతురును హత్య చేసిన సంఘటన బాయ్ రాంపూర్‌లో మూడు రోజుల క్రితం చోటు చేసుకుంది. బాధితురాలు పోలీసులకు ఫిర్యాదు చేసింది. సోమవారం పోలీసులు కేసు వివరాలు తెలియజేశారు. అత్యాచారం, హత్య కేసులో బాధిత మహిళ గ్రామంలో ప్రముఖుడితో సహా ముగ్గురు వ్యక్తులను నిందితులుగా తన ఫిర్యాదులో పేర్కొంది. బాధిత మహిళ ఇంటి పక్కన ఉండే నరేష్ అనే వ్యక్తి ఆమె ఇంటి తలుపు తట్టి అతని దుకాణంలో మరమత్తుల కోసం సుత్తి అడిగాడు. ఆమె తలుపు తీయగానే నరేష్‌తో పాటు గ్రామంలో ప్రముఖుడైన వ్యక్తి, మరో వ్యక్తి ఆమెను తోసుకొని లోనికి వచ్చారు. వెంటనే ఆమెను నేల మీద పడేసి రేప్ చేశారు. ఆమె అరుపులు విని నిద్ర లేచిన కూతురు తల్లిని రక్షించేందుకు ప్రయత్నించింది.

నిందితులు కూతురును కత్తితో పొడవటంతో ఆమె చనిపోయింది. ఘటన అనంతరం నిందితులు ముగ్గురు పారిపోయారు. వారు ఇప్పటికీ పరారీలోనే ఉన్నారు. సీనియర్ పోలీసు అధికారులు సంఘటన జరిగిన గ్రామానికి వెళ్లారు. రేప్‌కు గురైన మహిళను వైద్య పరీక్షల నిమిత్తం హాస్పిటల్ తరలించి, కూతురు మృతదేహాన్ని పోస్టుమార్టంకు పంపించారు. కూతురును పదునైనా ఆయుధంతో పొడవటం వల్ల చనిపోయినట్లు పోస్టుమార్టం రిపోర్టులో బయటపడింది. ఆమె కడుపుపై తీవ్ర గాయాలున్నాయి. మహిళ ఫిర్యాదు మేరకు తాము కేసును విచారణ చేస్తున్నామని చెప్పారు. కాగా అదే సమయంలో గ్రామ ప్రముఖుడుగా భావిస్తున్నతను అధికారులకు ఓ లేఖ రాశారు. ఈ దుర్ఘటన రాజకీయ కుట్రలో భాగమని ఆరోపిస్తూ లేఖ రాశారు.

Published On October 25, 2011