తెలంగాణపై కేంద్రానికి నివేదిక ఇవ్వబోను: గవర్నర్

By Pratap

Published: Thursday, October 27, 2011, 19:22 [IST]

న్యూఢిల్లీ: తెలంగాణపై తాను కేంద్ర ప్రభుత్వానికి నివేదిక ఇవ్వబోనని రాష్ట్ర గవర్నర్ నరసింహన్ చెప్పారు. మూడు రోజుల కోసం ఆయన గురువారం సాయంత్రం ఢిల్లీకి వచ్చారు. ఈ సందర్భంగా ఆయన తనను కలిసిన మీడియా ప్రతినిధులతో మాట్లాడారు. తాను నివేదిక ఇవ్వడానికి రాలేదని, గవర్నర్ల సమావేశంలో పాల్గొనడానికి మాత్రమే ఢిల్లీ వచ్చానని ఆయన చెప్పారు. తెలంగాణలో పరిస్థితి గురించి మీడియానే చెప్పాలని ఆయన అన్నారు. తెలంగాణ నాన్ గెజిటెడ్ ఉద్యోగ సంఘాల జెఎసి నేత స్వామిగౌడ్‌పై తనకు ఎవరూ ఫిర్యాదు చేయలేదని, తాను ఆ విషయం మీడియాలోనే చూశానని ఆయన అన్నారు.

సకల జనుల సమ్మె విరమణతో రాష్ట్ర ప్రజలు దీపావళి పండుగను సంతోషంగా జరుపుకున్నారని ఆయన అన్నారు. రాష్ట్రంలో పరిస్థితి ప్రశాంతంగా ఉందని ఆయన అన్నారు. రాష్ట్రంలో ఇప్పుడిప్పుడే ప్రశాంత పరిస్థితి నెలకొంటోందని ఆయన చెప్పారు. సకల జనుల సమ్మె విమరణ నేపథ్యంలో రాష్ట్ర పరిస్థితిపై గవర్నర్ నరసింహన్ కేంద్ర ప్రభుత్వానికి నివేదిక సమర్పిస్తారనే ప్రచారం జరుగుతోంది. ఆ పని మీదనే ఆయన ఢిల్లీ వచ్చారని అంటున్నారు.

Published On October 27, 2011