జగన్ వర్గం టిఆర్ఎస్‌లో చేరి...: ఎర్రబెల్లి దయాకర రావు

By Srinivas

Published: Sunday, November 6, 2011, 16:50 [IST]

హైదరాబాద్: తెలంగాణ ప్రాంతంలోని వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి వర్గం కాంగ్రెసు పార్టీ నేతలు తెలంగాణ రాష్ట్ర సమితిలో చేరి ఆయనకు మద్దతుగా నిలవాలనుకుంటున్నారని తెలుగుదేశం పార్టీ సీనియర్ శాసనసభ్యుడు ఎర్రబెల్లి దయాకర రావు ఆదివారం ఆరోపించారు. దివంగత ముఖ్యమంత్రి వైయస్ రాజశేఖర రెడ్డి బతికున్నప్పుడు మాజీ మంత్రి కోమటిరెడ్డి వెంకట్ రెడ్డి తెలంగాణను తొక్కి పెట్టారని ఆరోపించారు. జగన్ వర్గం తెలంగాణలో తిరగలేని పరిస్థితి ఉంది కాబట్టి వారు తెలంగాణ ముసుగు వేసుకోవాలని చూస్తున్నారన్నారు. కోమటిరెడ్డి దీక్షకు మద్దతు పలికిన టిఆర్ఎస్ స్వతంత్ర సమరయోధుడు కొండా లక్ష్మణ్ బాపూజీ దీక్షకు ఎందుకు మద్దతు పలకలేదని ప్రశ్నించారు.

టిఆర్ఎస్ నేతలు నిత్యం పంచాయతీ రాజ్ శాఖ మంత్రి జానారెడ్డి చుట్టూ తిరగడం హాస్యాస్పదమన్నారు. పోలవరం టెండర్లు రద్దు చేయాలని కోరుతూ ఈ నెల 8న గవర్నర్‌ను కలుస్తామని చెప్పారు. టెండర్లు వెంటనే రద్దు చేయాలని కోరతామన్నారు. పోలవరం టెండర్లు రద్దు చేయాలని కోరి అసలు దొంగ తప్పించుకోవాలని చూస్తున్నారని టిఆర్ఎస్ చీఫ్ కె చంద్రశేఖర రావును ఉద్దేశించి అన్నారు. పోలవరం టెండర్ల అంశంలో టిఆర్ఎస్‌పై తాము చేసిన ఆరోపణలకు కట్టుబడి ఉన్నామన్నారు.

Published On November 6, 2011