పార్లమెంటుకు వెళ్లి తెలంగాణపై తేల్చుకుంటాం: గుత్తా

By Srinivas

Published: Sunday, November 6, 2011, 10:14 [IST]

హైదరాబాద్: తాము పార్లమెంటుకు వెళ్లి తెలంగాణపై తేల్చుకుంటామని కాంగ్రెసు పార్లమెంటు సభ్యుడు గుత్తా సుఖేందర్ రెడ్డి ఆదివారం అన్నారు. నిమ్స్‌లో చికిత్స పొందుతున్న మాజీ మంత్రి కోమటిరెడ్డి వెంకట్ రెడ్దిని గుత్తా, ఏఐసిసి అధికార ప్రతినిధి పొంగులేటి సుధాకర్ రెడ్డి పరామర్శించారు. అనంతరం వారు మీడియాతో మాట్లాడారు. కేంద్రం వెంటనే తెలంగాణపై నిర్ణయం తీసుకోకుంటే దీక్షలు ఆగవని గుత్తా హెచ్చరించారు. 2009 డిసెంబర్ 9న చేసిన ప్రకటనకు కేంద్రం కట్టుబడి ఉండాలన్నారు. కోమటిరెడ్డి ఫ్లూయిడ్స్ తీసుకోవడానికి నిరాకరిస్తున్నారని అలా అయితే ఆయన ఆరోగ్యం మరింత క్షీణించే అవకాశముందన్నారు.

తాను ఆసుపత్రిలోనే దీక్ష కొనసాగిస్తానని కోమటిరెడ్డి చెప్పారన్నారు. దీక్ష విరమణపై వారి కుటుంబ సభ్యులతో మాట్లాడతామన్నారు. మంత్రి జానారెడ్డితోనూ సమావేశమవుతామని చెప్పారు. కోమటిరెడ్డి దీక్ష గురించి పార్టీ అధిష్టానానికి తెలిపినట్లు పొంగులేటి తెలిపారు. తెలంగాణ సెంటిమెంటుతో భారతీయ జనతా పార్టీ ప్రజల జీవితాలతో ఆడుకోవాలని చూస్తుందని విమర్శించారు.

Published On November 6, 2011