నేరెడ్‌మెట్‌లో మంత్రి శంకరరావుపై కేసు నమోదు

హైదరాబాద్: చేనేత, జౌళీ శాఖ మంత్రి శంకరరావుపై హైదరాబాదులోని నేరెడ్‌మెట్ పోలీసులు గురువారం కేసు నమోదు చేశారు. మల్కాజిగిరి కోర్టు ఆదేశాల మేరకు పోలీసులు ఈ కేసు నమోదు చేశారు. గ్రీన్ ఫీల్డ్ భూముల కబ్జాపై బాధితుల ఫిర్యాదుతో మంత్రిపై విచారణ జరిపి 120బి, 197, 420, 468, 471, 506 సెక్షన్ల కింద కేసు నమోదు చేయాలని కోర్టు బుధవారం ఆదేశాలు జారీ చేసిన విషయం తెలిసిందే. తమపై తప్పుడు సమాచారం ఇచ్చి కోర్టును, ప్రభుత్వాన్ని తప్పుదోవ పట్టించారని గ్రీన్‌ఫీల్డ్ ప్రతినిధులు నేరేడ్‌మెట్ పోలీసులకు ఫిర్యాదు చేశారు.

తమ ఫిర్యాదును పోలీసులు పట్టించుకోవడం లేదని గ్రీన్‌ ఫీల్డ్ ప్రతినిధులు కోర్టుకెక్కారు. గ్రీన్‌ఫీల్డ్ ప్రతినిధుల ఫిర్యాదుపై స్పందించిన కోర్టు శంకరరావుపై విచారణ జరిపించి కేసు నమోదు చేయాలని ఆదేశించింది. కాగా అక్రమాలు, అవినీతిపై ఇతర విషయంలో కోర్టుకెక్కే శంకరరావుకే కోర్టు షాక్ ఇవ్వడం విశేషం. శంకరరావు రాసిన లేఖ కారణంగానే వైయస్సార్సీ పార్టీ అధ్యక్షుడు వైయస్ జగన్మోహన్ రెడ్డి ఆస్తులపైన ప్రస్తుతం విచారణ జరుగుతోంది. అలాగే మరో ఇద్దరు మంత్రుల అక్రమాలపై విచారణ జరపాలని శంకరరావు ఇటీవల కోర్టుకెక్కిన విషయం తెలిసిందే.

English summary

Case booked against minister Shankar Rao today in Neredmet police station by Malkajgiri court orders.