జగన్‌కు మరో నోటీసు, 28లోగా ఈడి ముందుకు

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డికి ఎన్‌ఫోర్స్‌మెంట్ డైరెక్టరేట్(ఈడి) గురువారం నోటీసులు జారీ చేసింది. మనీలాండరింగ్, ఫెమా కింద ఈడి జగన్‌కు నోటీసులు జారీ చేస్తూ ఈ నెల 28వ తేదీలోగా అధీకృత ప్రతినిధి తమ ముందు హాజరు కావాలని ఆదేశించింది. జగన్‌కు చెందిన సాక్షిని నడుపుతున్న జగతి పబ్లికేషన్స్‌లోకి అక్రమంగా నిధులు వచ్చినట్లు ఆరోపణలు ఉన్నాయి. జగన్ తన తండ్రి హయాంలో ప్రభుత్వం తరఫున పలు కంపెనీలకు ఆయాచితంగా భూముల వంటివి కట్టబెట్టి వారి నుండి విదేశాల ద్వారా తన కంపెనీల్లోకి నిధులు మళ్లించినట్లు ఆరోపణలు ఉన్నాయి.

కాగా ఇటీవలె జగన్ కర్నాటక మాజీ మంత్రి, భారతీయ జనతా పార్టీ సీనియర్ నాయకుడు గాలి జనార్ధన్ రెడ్డికి చెందిన ఓబుళాపురం గనుల కేసులో సిబిఐ ముందు హాజరైన విషయం తెలిసిందే. ఇప్పుడు జగతిలోకి వచ్చిన పెట్టుబడులపై ఈడి ముందు హాజరు కావాల్సి ఉంది. మనీలాండరింగ్ కేసులో దోషిగా తేలితే శిక్షతో పాటు రెండు రెట్లు జరిమానా కూడా విధించే అవకాశాలు ఉన్నట్లు తెలుస్తోంది. మరోవైపు స్టైలిష్ హోం ఎండి కోనేరు ప్రసాద్ కస్టడీ గురువారం ముగియడంతో ప్రత్యేక కోర్టు ముందు సిబిఐ అధికారులు ఆయనను హాజరుపర్చారు.

English summary

Widening its probe into the finances of YSR Congress chief Y S Jaganmohan Reddy, the ED has issued summons to him in connection with the money laundering case against the MP.